Для таго, каб стаць паспяховай, гарманічнай, усебаковай асобай, інтэлектуальнае развіццё з’яўляецца абавязковай умовай. Сёння вельмі папулярныя сярод дарослых і дзяцей інтэлектуальныя гульні. Пазнавальная актыўнасць стымулюецца азартам, спаборніцкім характарам гульні.

Інтэлектуальныя гульні – гэта не толькі крыніца ведаў, але і радасці, задавальнення ад інтэлектуальных перамог, ад свайго ўмення паказаць запас ведаў, быць знаходлівым, вырашаць цяжкія задачы.

Інтэлектуальныя гульні дапамагаюць разнастаіць вольны час, развіць разумовыя здольнасці, пашырыць слоўнікавы запас, палепшыць памяць, стаць больш уважлівым. А гэта ў жыцці вельмі спатрэбіцца! Бо не толькі рукі, ногі, цела, але і мозг чалавека патрабуе пастаяннай трэніроўкі, практыкаванняў. У выніку практыкаванняў, розум чалавека становіцца вастрэй, а сам ён  – знаходлівей, больш кемлівым.

У Пархімаўскім яслях-садзе – базавай школе стала традыцыяй правядзенне агульнашкольных інтэлектуальных гульняў. Гульні праводзяцца з перыядычнасцю раз у месяц. Кожны клас – каманда. Навучэнцам загадзя аб’яўляецца тэма гульні, каб у іх была магчымасць прачытаць больш літаратуры па зададзенай тэме. У фае афармляюцца кніжныя выставы па дадзенай тэме. Працуе аб’яднанне па інтарэсах “Інтэлектуальныя гульні”. Такім чынам, з дапамогай правядзення гульняў, у навучэнцаў фарміруецца патрэба ў сістэматычным чытанні. Такія інтэлектуальныя чэмпіянаты вельмі падабаюцца дзецям. Можна зрабіць выснову: правядзенне інтэлектуальных гульняў аказвае станоўчы ўплыў на навучэнцаў. Руская прыказка гаворыць: “Хто шмат чытае, той шмат ведае”. І гэта даказана нашымі перамогамі ў раённых інтэлектуальных гульнях “Што? Дзе? Калі?”, “Гульні розуму”.

Гуляючы, вучні выхоўваюць у сабе шмат карысных якасцяў. Найважнейшая з іх – здольнасць да хуткага лагічнага мыслення і ўменне не губляцца ў складанай сітуацыі.

Святлана ВОЙШЭЛЬ, намеснік дырэктара па асноўнай дзейнасці Пархімаўскага ясляў-сада – базавай школы