Хлеб – усяму галава. Гэта не проста словы, а сапраўдная народная мудрасць, якая праходзіць праз стагоддзі. З даўніх часоў хлеб быў і застаецца сімвалам дастатку, працы і жыцця. У кожнай хаце ён займаў пачэснае месца на стале, а першы кавалак заўсёды аддавалі самаму паважанаму чалавеку. Хлеб суправаджае нас кожны дзень: і на свята, і ў будні. У яго смаку – водар роднай зямлі, цяпло матуліных рук і стараннасць тых, хто працуе на палях. Менавіта гэтаму галоўнаму прадукту на нашым стале і тым, хто яго вырошчвае, было прысвечана традыцыйнае свята хлеба “З прыпекам”, якое сёння прайшло ў аграгарадку Массаляны.
Вітаючы ўдзельнікаў свята, дырэктар раённага ўнітарнага сельскагаспадарчага прадпрыемства «Масаляны» Алег Антушевіч выказаў шчырую падзяку ўсім, хто штогод забяспечвае нас хлебам.
– Нізкі паклон вам за вашу цярплівасць, самаадданую і плённую працу! Кожны год вы на “выдатна” здаеце экзамен на вернасць зямлі, – адзначыў Алег Восіпавіч. – Здароўя вам, дабрабыту і мірнага неба над галавой! Без вас не было б ні свята, ні хлеба на стале.
Першы намеснік старшыні Бераставіцкага раённага выканаўчага камітэта, начальнік упраўлення сельскай гаспадаркі і харчавання Дзмітрый Ціхановіч таксама падзякаваў усім хлебаробам за старанную працу і ўручыў узнагароды лепшым працаўнікам гаспадаркі. Ганаровай граматай Бераставіцкага райвыканкама быў узнагароджаны трактарыст‑машыніст сельскагаспадарчай вытворчасці Віктар Карпук, граматай райвыканкама – вадзіцель Рамзіль Зайнуллін, падзячным пісьмом райвыканкама – трактарыст‑машыніст сельскагаспадарчай вытворчасці Андрэй Шаўчук.
Цэлы шэраг працаўнікоў гаспадаркі атрымалі граматы РУСП “Массаляны”, якія ўручыў дырэктар Алег Антушевіч.
Узнагароды для масалянскіх хлебаробаў падрыхтавала і Бераставіцкая раённая прафсаюзная арганізацыя работнікаў аграпрамысловага комплексу, іх уручыў першы намеснік старшыні Бераставіцкага раённага выканаўчага камітэта, начальнік упраўлення сельскай гаспадаркі і харчавання Дзмітрый Ціхановіч.
Са словамі віншаванняў да ўдзельнікаў жніва звярнуўся таксама старшыня Алекшыцкага сельскага выканаўчага камітэта Мікалай Прымачэнка. Падзячным пісьмом за актыўны ўдзел і высокую адказнасць у рэалізацыі мерапрыемстваў па навядзенню парадка на тэрыторыі Алекшыцкага сельсавета быў узнагароджаны галоўны аграном РУСП “Массаляны” Сяргей Калеснік.
Дажыначныя снапы – «Карону жніўных палеткаў» – вядучыя мерапрыемства ўрачыста перадалі кіраўніку гаспадаркі і галоўнаму аграному Сяргею Калесніку. А яшчэ і абавязковыя караваі новага ўраджая – не проста як вяршыню пекарскага майстэрства, а як велічны помнік сумеснай працы чалавека і прыроды.
Дарэчы, смак духмяных караваяў і свежага печыва паспрабавалі ўсе прысутныя – на свяце хлеба гэта абавязковы рытуал.
Не абышлося і без народнай творчасці: з таямніцамі народнага майстэрства можна было пазнаёміцца на майстар‑класе па традыцыйных рамёствах, які праводзіў аддзел рамёстваў і традыцыйнай культуры Береставіцкага раённага цэнтра культуры і народнай творчасці.
Асаблівую атмасферу свята стваралі выступленні артыстаў: цудоўную праграму падрыхтавалі работнікі Береставіцкага раённага цэнтра культуры і народнай творчасці, парадаваў сваім выступленнем і народны ансамбль песні «Уладары» з Ваўкавыска – іх песні, напоўненыя любоўю да роднай зямлі, падымалі настрой усім прысутным. І гэта не выпадкова: спрадвеку лічылася, што адным з лепшых падарункаў напрыканцы жніва з’яўляецца добрая песня.
Для дзяцей ладзілі гульні і забавы, каб маладое пакаленне з маленства адчувала, што хлеб – гэта не толькі ежа, а частка нашай гісторыі і традыцый.
На працягу ўсяго дня працавалі гандлёвыя рады, фуд‑корт і дзіцячыя атракцыёны: можна было паспрабаваць свежае печыва, набыць сувеніры, пагуляць з дзецьмі. Шмат эмоцый юным жыхарам і гасцям Масалян падарыў фестываль фарбаў.
Больш фота
ТУТ
