Дыпломы ІІ і ІІІ ступені прывезлі прадстаўнікі Бераставіччыны з абласнога агляду-конкурсу выканаўцаў размоўнага жанру, які адбыўся ў Гродзенскім абласным метадычным цэнтры народнай творчасці. Конкурс гэты традыцыйны, праводзіцца раз у два гады, і нашы выканаўцы заўсёды вяртаюцца з абласнога цэнтра з узнагародамі. Так адбылося і на гэты раз. Выступленні бераставіцкіх артыстаў зноў былі адзначаны журы ў ліку лепшых. У намінацыі “камедыйна-сатырычныя творы” юныя ўдзельніцы гуртка “майстэрства вядучага” РДК Іраіда Лысенкова, Алена Філюшкіна і Яна Дземчанка (мастацкі кіраўнік ­– рэжысёр аддзела па рабоце з моладдзю РДК Аляксандра Міцкевіч) занялі 2-е месца. Дзяўчынкі выканалі гумарыстычны твор “Скороговорочный рассказ” і пакарылі журы і гледачоў сваёй непасрэднасцю і арыгінальнасцю выканання. Скарагаворка – жартоўны жанр вуснай народнай творчасці, які вызначаецца складанасцю выканання, патрабуе ад артыста пэўнай маўленчай трэніроўкі. Дзяўчынкі не толькі справіліся з цяжкасцю вымаўлення, але зрабілі гэта артыстычна, па-сапраўднаму рассмяшылі залу. Дарэчы, мастацкі твор, які прадстаўлялі ўдзельніцы на конкурсе, нарадзіўся дзякуючы іх мастацкаму кіраўніку Аляксандры Міцкевіч, якая надала вядомым скарагаворкам адзіную сюжэтную лінію. Яшчэ адна наша ўдзель­ніца абласнога агляду-кон­кур­су Кацярына Чорная з Мала­бераставіцкаяга ЦДК (мас­тацкі кіраўнік Любоў Валейка) стала ўладальніцай дыплома ІІІ ступені ў намінацыі “проза, інсцэніроўка празаічнага твора”. Юная артыстка выканала твор “Языкасты рэйс”, ды так лоўка завалодала аўдыторыяй, што журы гэта не магло не адзначыць. Святлана Ганчарова, фота Віталія Масюка На здымку: Іраіда Лысенкова, Алена Філюшкіна і Яна Дземчанка.