Дзяржава шмат робіць для развіцця аграрнага сектару. Асаблівая ўвага надаецца жывёлагадоўлі. У рэспубліцы робіцца стаўка на інтэнсіўную вытворчасць, будаўніцтва новых сучасных малочнатаварных комплексаў. Не абыходзіцца пры гэтым і без праблем, у многіх месцах не давялося пакуль што дабіцца добрай аддачы ад укладвання вялікіх сродкаў. І хаця ранейшыя дробныя фермы ў 21 стагоддзі ўжо “зжылі сябе”, некаторыя важкія перавагі там былі. Напрыклад, жывёла пасвілася на вольным паветры пад сонцам, карысталася актыўным мацыёнам, што вельмі карысна для здароўя. Таму ў сучасных умовах, калі дойны статак знаходзіцца на круглагадовым стойлавым утрыманні, значна менш рухаецца, узрастае роля ветэрынарыі. Каб працаваць у сельгас­кааператыве, трэба мець асаблівую адказнасць, не баяцца руплівай паўсядзённай працы, а прафесію неабходна выбіраць па прызванні. Не можа быць добрага ветурача без спагадлівасці да жывёлы, імкнення дапамагчы жывой істоце. Таму прыемна пагутарыць з маладым чалавекам, крэда якога - любіць жывёлу. У нашым раёне моцная ветэрынарная служба, і выдатна, што яна ўмацоўваецца маладымі кадрамі. Галоўны ветурач СВК “Цецяроўка” Дзмітрый Куляшоў (на здымку) закончыў Вялікабераставіцкую сярэднюю школу, Ваўкавыскі аграрны каледж, а зараз атрымлівае вышэйшую адукацыю ў Гродзенскім аграрным універсітэце. У хлопца спагадлівы характар, і зараз у яго дома жывуць сабака, хамякі і ... нават заяц, якога ледзь жывога дасталі з-пад касілкі. Ён паспяхова яго падлечыў, і зайчык есць моркву, капусту, траву і падыходзіць да рук, разумее чалавечы клопат і ласку. Вельмі добры хлопец і ў сям’і – з малых гадоў дапамагаў маме, клапатліва даглядаў малых сястрычак, з такім пазітыўным вопытам будзе ён і для будучай жонкі надзейнай апорай. Вучыцца ў аграрным універсітэце цікава. Дзмітрый стараецца прымнажаць веды, якія так неабходны пры лячэнні жывёлы ў гаспадарцы. Як і ўсюды, ёсць у СВК “Цецяроўка” цяжкасці, але галоўнае – крок за крокам іх пераадольваць. -- Хлопец самастойны і старанны, -- гаворыць пра Дзмітрыя Куляшова галоўны ветурач раёна Аляксандр Баброў. Такая хаця і лаканічная, але ёмістая характарыстыка, дае повад сцвярджаць, што з маладога ветурача будзе толк. Ніна Наддэ, фота аўтара