Жыхару Вялікай Бераставіцы Уладзіміру Іванавічу Хільману сёлетняя восень падарыла багаты ўраджай гарбузоў. Мы бачылі іх, аранжава-жоўтых веліканаў, і ў агародзе, і нават… высока на яблыні. Каля аднаго адважнага гарбуза-верхалаза і сфатаграфавалі гаспадара. Завязаўся і вырас велікан на ніжніх галінах яблыні, а іншыя дык наліваліся сокам ў самым версе, недзе на 6-мятровай вышыні. — Сам упершыню бачу такое, - смяецца Уладзімір Іванавіч. – Адзін гарбуз я сам сарваў, другі ўпаў пад моцным ветрам, а вунь той, на самай вершаліне, яшчэ трымаецца… Суседства яблыкаў і гарбузоў здавалася сапраўды экзатычным. Мы з гаспадаром жартам памеркавалі, што і смак тых і другіх пладоў, пэўна, таксама экзатычны. — Трэба добра рассмакаваць, - засмяяўся Уладзімір Іванавіч. Марыя Драпеза, фота аўтара