Падрыхтоўка якаснага насення ў гаспадарках пачынаецца яшчэ да жніва. Менавіта ў гэты час рыхтуюцца склады, каб прыняць спелае залатое зерне. Яны чысцяцца, апрацоўваюцца ад шкоднікаў. Адразу пасля ўборкі насенне сушыцца, затым ачышчаецца на спецыяльных лініях. Для насеннага матэрыялу ёсць адпаведныя стандарты, якія строга захоўваюцца. Цікава, напрыклад, што ў 50 грамах насеннага матэрыялу неабходна, каб была пэўная колькасць зярнятак. Так патрабуе сучасная агранамічная навука. Ігнараваць стандарты немагчыма, іх строгае захаванне – у інтарэсах вытворцаў. А ўсяго для яравой сяўбы ў гаспадарках Бераставіччыны ў гэтым годзе патрабуецца 922 тоны насення збожжавых і зернебабовых. Пшаніцы неабходна падрыхтаваць 221 тону, ячменю – 473 тоны, аўса – 43 тоны, грэчкі – 18 тон, проса -- 2 тоны, зернебабовых – 165 тон. Па словах галоўнага агранома Бераставіцкай раённай інспекцыі па насенняводству, каранціну і ахове раслін Таццяны Жыўлюк, на 6 лютага ў сельгаскааператывах падрыхтавалі 914 тон кандыцыйнага насення, або 99,1 працэнта ад поўнай патрэбы. Не даведзена было пакуль да кандыцый 8 тон грэчкі. А сеюць гэтую запатрабаваную і каштоўную культуру ўсе гаспадаркі, акрамя СВК імя Варанецкага і “Алекшыцы”. На выпадак перасеву ў раёне ёсць немалы рэзерв – 800 тон кандыцыйнага насення. Для рэалізацыі нашым мясцовым гаспадаркам, а таксама і вытворцам з усёй Гродзеншчыны ў СВК “Малабераставіцкі элітгас” ёсць добры запас (533 тоны) кандыцыйнага насення. Гэты сельгаскааператыў заслужыў выдатную рэпутацыю на ўзроўні вобласці і рэспублікі, і высокай якасцю прадукцыі пакупнікі задаволены. Сярод аграномаў -насенняводаў, якія клапоцяцца пра будучы шчодры ўраджай, Таццяна Жыўлюк вызначае, напрыклад, Вольгу Талочка (на здымку) з СВК імя Варанецкага. У гэтай гаспадарцы поўнасцю падрыхтаваны насенны матэрыял і 180 тон яшчэ ёсць у рэзерве. Вольга -- наша зямлячка, былая жыхарка райцэнтра, яна закончыла Вялікабераставіцкую сярэднюю школу. -- Гродзенскі аграрны ўніверсітэт, шчыра кажучы, я выбрала выпадкова, -- расказвае мая маладая і абаяльная субяседніца. – На першым курсе мы, “новаспечаныя” студэнты, яшчэ адчувалі сябе вольна, не зусім увайшлі ў курс справы. А ўжо затым зразумелі, куды трапілі, якая дакладная і сур’ёзная праца агранома. Я закончыла факультэт аховы раслін. Вучыцца было хаця і цяжка, але вельмі цікава! Мы вывучалі спецпрадметы – фітапаталогію, энтамалогію, біялагічныя і хімічныя метады аховы раслін, а таксама многае іншае. У кожным знаходзілі нешта займальнае. У Вольгі літаральна загараюцца вочы, калі яна расказвае пра агранамію. Аказваецца, ахоўваць расліны можна не толькі з дапамогай хімічных прэпаратаў, але і некаторых насякомых. У шкоднікаў ёсць свае ворагі. У спецыяльных лабараторыях вырошчваюцца, напрыклад, карысныя кляшчы, якія харчуюцца шкоднымі. Кавалачак глебы з імі можна купіць у спецыяльным магазіне і нават паспяхова прымяніць у сябе на прысядзібным участку. У СВК імя Варанецкага дзяўчына трапіла маладым спецыялістам, а зараз мае ўжо трывалы вопыт. Яна лічыць, што знайшла сябе, рэалізавала ў любімай справе свой патэнцыял. Работа агранома-насеннявода ёй па душы. Насенне яравых у СВК імя Варанецкага перспектыўных гатункаў, яны прыстасаваныя да нашых кліматычных умоў і даюць пры належным захаванні тэхналогій выдатны ўраджай. Гэта і Вользінымі рукамі і ўменнем мацуецца падмурак для новых поспехаў у раслінаводстве ў гэтай вядомай на ўсю рэспубліку гаспадарцы. Вядома, як і ў кожным занятку, не абыходзіцца тут часам без цяжкасцей і праблем. Але побач з аграномам-насенняводам дасведчаныя старэйшыя калегі, якія падтрымаюць у цяжкую хвіліну і мудрым цёплым словам, і карыснай парадай. У першую чаргу, Вольга ўдзячна сваім калегам з раённай інспекцыі па насенняводству, каранціну і ахове раслін, а таксама былому насенняводу СВК імя Варанецкага Любові Марцінкевіч, якая ўжо на заслужаным адпачынку, яе мужу, кладаўшчыку Віктару Марцінкевічу. Словы падзякі выказвае яна таксама працаўнікам гаспадаркі Валянціне Еўлашэвіч, Андрэю Лісоўскаму, Дзянісу Трайгелю, Аляксандру Пракопчыку, Іосіфу Станеўскаму, Раману Красніцкаму і іншым. Моцная каманда з года ў год падтрымлівае гонар і дабрабыт сельгаскааператыва. Ніна Наддэ, фота аўтара