“Дзівосныя карункі вясны” – назва арганізаванай на абанеменце Бераставіцкай цэнтральнай раённай бібліятэкі выставы дэкаратыўна-прыкладных работ жыхаркі вёскі Эймінаўцы Зінаіды Іванаўны Конік. Прадстаўленыя вышываныя вырабы і карункі народнай умеліцы і майстрыхі – вельмі прыгожыя, элегантныя, вытанчаныя, выкананыя з выкарыстаннем свежых далікатных фарбаў. І спецыялістам быць не трэба, каб адчуць, што ў свае творы жанчына ўклала часцінку душы і любові, а таму яны, сапраўды, выпраменьваюць своеасаблівае хараство і веснавы настрой. Зінаіда Іванаўна – былая настаўніца хіміі і біялогіі. Пачынала выкладаць у Макараўскай сярэдняй школе, працавала ў Бераставіцкай школе і ў Старадварэцкай. Чалавек вельмі сціплы, яна не лічыць сваё захапленне чымсьці адметным. Вышываць, шыць, вязаць пруткамі і кручком умелі практычна ўсе дзяўчаты, яе аднагодкі. Вучыцца гэтаму прымушала жыццё, цяжкі пасляваенны час, калі было складана з аддзеннем, абуткам, прадметамі побыту. Жанчыны ўсё рабілі сваімі рукамі: ткалі, шылі, вязалі, вышывалі і, безумоўна, аздаблялі ўсе свае вырабы прыгожымі ўзорамі і арнаментам. Навыкі рамёстваў пераймалі ад бабуляў і матуляў. З гадамі такая неабходнасць у многіх, у тым ліку і ў Зінаіды Іванаўны, перарасла ў хобі, стала справай душы, своеасаблівай аддушынай і адпачынкам. Яна і дачкам перадала сваё захапленне, і вучаніц сваіх пазнаёміла з асновамі вышыўкі і вязання. Жанчына і цяпер, нягледзячы на сталы ўжо ўзрост, працягвае займацца любімай справай і, дарэчы, заахвочвае да вышывання сваіх сябровак і суседак. Падчас урачыстага адкрыцця выставы Зінаіда Іванаўна падзялілася сакрэтамі свайго майстэрства з гасцямі сустрэчы. Дырэктар Бераставіцкай РЦБС Таццяна Марцішэвіч зрабіла невялічкі экскурс у гісторыю такога рамяства, як вышыўка. Прадстаўляючы народную ўмеліцу, Таццяна Дзмітрыеўна расказала, як адбылося знаёмства з ёю спачатку бібліятэкараў бібліобуса, і як потым нарадзілася ідэя праз выставу прадставіць яе ўсім прыхільнікам традыцыйнай дэкаратыўна-прыкладной творчасці. Высокую адзнаку вышываным вырабам і карункам Зінаіды Іванаўны дала дырэктар Бераставіцкага Дома рамёстваў Тамара Касьян, падкрэсліўшы, што ўсе прадстаўленыя рэчы дастаткова складаныя ў выкананні, вызначаюцца арыгінальнасцю ўзораў і тонкім густам. Тамара Мікалаеўна запрасіла майстрыху да ўдзелу ў будучых раённых экспазіцыях. Што можна паглядзець на выставе? Вышываныя карціны, ручнікі і настольніцы, звязаныя кручком, каўнерыкі, сурвэткі і абрусы. Нават вышываныя паштоўкі, якімі жанчына звычайна віншуе са святамі сваіх самых родных і блізкіх людзей. Завітайце ў бібліятэку! Вядома ж, лепш пабачыць на свае вочы ўсю тую прыгажосць, якую стварылі рукі звычайнай жанчыны, нашай зямлячкі. Святлана Ганчарова, фота аўтара