Каб замясціць імпарт некаторых прадуктаў раслі­наводства і падтрымаць сваіх аграрыяў, у краіне дзейнічае дзяржаўная комп­лексная праграма раз­віцця бульбаводства, агародніцтва і пладаводства на 2011 – 2015 гады. Яна прадугледжвае і інвестыцыі для ўкаранення ў вытворчасць сучасных высокіх тэхналогій, каб наша сельская гаспадарка магла быць канкурэнтаздольнай сярод вытворцаў на багатым і насычаным сусветным рынку. У краіне право­дзяцца семінары, куды запрашаюць аграномаў. Там яны могуць даведацца шмат цікавага. Нядаўна выконваючы аба­вязкі начальніка ўча­стка “АграСад” СВП “АграМір” Сяргей Агнеўскі пабываў на чарговым такім рэспубліканскім мерапрыемстве ў Мінскім раёне. Праводзіў семінар Інстытут пладаводства Нацыянальнай акадэміі навук Беларусі. Удзел у ім прыняў намеснік міністра сельскай гаспадаркі і харчавання Рэспублікі Беларусь Васіль Паўлоўскі. На базе гаспадаркі “Усход” была паказана сучасная садовая тэхніка. Напрыклад, быў прадэманстраваны збор яблык сучасным самаходным агрэгатам. Затым па канвееры яблыкі выгружаюцца ў сховішча. Яны не б’юцца, іх можна доўга за­хоўваць. Дарэчы, на сённяшні дзень смачныя яблыкі айчыннай селекцыі, вырашчаныя без мноства хімічных апрацовак у два і нават тры разы танейшыя падобных імпартных. А яшчэ ў рэспубліцы будуць вырошчвацца грушы, таму што на сённяшні дзень у продажы ёсць толькі імпартныя. Айчынныя ў гандлёвую сетку зрэдку здаюць прыватнікі. Так, імпартныя грушы ўражваюць сваім прывабным выглядам, але беларускія вучоныя сцвярджаюць, што і мы можам вырошчваць не горшыя. А яшчэ людзі з задавальненнем будуць купляць слівы, вішні, ягады. Трэба толькі займацца развіццём пладаводства, і можна будзе напоўніць рынак айчыннай прадукцыяй. Зразумела, што гэта няпроста. Трэба пераадолець шмат перашкод, мець жаданне займацца такой справай. Па словах Сяргея Аг­неў­скага, у час рэспуб­ліканскага мерапрыемства было паказана шмат сучаснай тэхнікі. Зацікавіла людзей сартавальная лінія для разнастайных пладоў, апырсквальнікі і многае іншае. Былі таксама прадстаўлены прэпараты для догляду за дрэвамі. -- Пабываць на рэспуб­ліканскіх семінарах заўсёды цікава, -- гаворыць Сяргей Іванавіч. – На іх сапраўды дакранаешся да высокіх тэхналогій. Ды і гутаркі з калегамі таксама шмат даюць. У садзе СВП “АграМір” за­раз дабудоўваецца схо­вішча, вядзецца догляд за маладымі яблынькамі. Ніна Наддэ