Менавіта такая думка была асноўнай нядаўна на раённым семінары - нарадзе па ветэрынарыі, прысвечаным рабоце ў пачатку гэтага года і задачах на перспектывуУ чарговай традыцыйнай штомесячнай сустрэчы галоўных ветурачоў гаспадарак прыняў удзел загадчык туберкулёзнага аддзела дыягнастычнай установы “Гродзенская абласная ветэрынарная лабараторыя” Мікалай Гаўрылюк. Ён расказаў пра абстаноўку, якая склалася ў вобласці з гэтым небяспечным захворваннем жывёлы і людзей. Адзначалася, што на 100 тысяч чалавек маюць адкрытую форму туберкулёзу 45. Захворванне гэтае каварнае, стварае шмат праблем. З ім нельга працаваць у жывёлагадоўлі. За мінулы год у вобласці было выдзелена 928 галоў буйной рагатай жывёлы, якія рэагавалі на ўнутрыскурнае ўвядзенне туберкуліну. Гэта таксама нямала. Буйная рагатая жывёла, якая рэагуе на алергічнае даследаванне туберкулінам, адпраўляецца на дыягнастычны зарэз. Да ведама спажыўцоў: сырое такое мяса ў магазіны не пастаўляецца. На мясакамбінатах яго падвяргаюць тэрмічнай апрацоўцы і ідзе яно, напрыклад, на тушонкі. Хвалявацца не трэба – набрацца хваробы праз правараныя мясныя прадукты немагчыма. Патрабаванні ветэрынарна - санітарных правілаў пры гэтым выконваюцца. Абстаноўка ў нашым раёне знаходзіцца пад кантролем, туберкулёзу жывёлы ў нас не выяўлена. Цікавым было таксама выступленне загадчыка лабараторыі райветстанцыі Станіслава Сіда­ровіча. Адзначалася, што кармы з гаспадарак раёна правяраюцца на якасць. Адкрытыя сянажныя траншэі даследуюцца паўторна. Кармы правяраюцца на ўтрыманне каратыну, кальцыю і іншае. Яны павінны быць паўнацэннымі і забяспечваць патрэбы жывёлы. Такія праверкі праводзяцца своечасова і паказалі, што кармы ў сельгаскааператывах у парадку. Згодна з загадам Міністэрства сельскай гаспадаркі і харчавання Рэспублікі Беларусь у гаспадарках бярэцца кроў у цялят для даследавання на імунаглабулін. Па пэўнай схеме нованароджаныя павінны атрымліваць малодзіва. Першую яго порцыю трэба выпаіць цяляці ў першую гадзіну пасля нараджэння. Гэта вельмі важна, марудзіць нельга. Калі цялятка атрымала малодзіва дастаткова, у яго пачынае фарміравацца моцная імунная сістэма. Потым такая жывёла менш хварэе. Калі аналізы на імунаглабулін нармальныя, начныя і дзённыя даглядчыкі атрымліваюць за сваю добрасумленнасць даплату. Лю­дзям пайшлі насустрач, зацікавілі іх матэрыяльна, каб мець аддачу і “гэта працуе”. Калі нараджаецца мёртвае цяля, таксама робіцца адпаведны аналіз крыві, каб высветліць прычыну і выкараніць яе. Даследаванні праводзяцца своечасова. Пра задачы на будучае паве­даміў галоўны ветурач раёна Віталій Прыходзька. Ён завастрыў увагу на скарачэнні невытворчага выбыцця жывёлы, правілах закупу маладняку, афрыканскай чуме свіней. Ніна Наддэ