Сёння нашы пытанні скіраваны да галоўнага дзяржаўнага санітарнага ўрача раёна Івана Ляпешкі. Якія прадукты купляем? - Іван Уладзіміравіч, наколькі ведаю, маніторынг і праверкі аб’ектаў гандлю і прадпрыемстваў грамадскага харчавання краіны сёлета ўзмоцнены. А ў нашым раёне? - Вядома ж, таксама. Гэтага патрабуе пастанова намесніка міністра Міністэрства аховы здароўя, Галоўнага дзяржаўнага санітарнага ўрача РБ №2 ад 6 студзеня 2012 года “Аб актывізацыі і павышэнні эфектыўнасці выканання санітарна-эпідэміялагічнага заканадаўства гандлёвымі аб’ектамі, рыначнымі ўтварэннямі, аб’ектамі грамадскага харчавання і прыдарожнага сэрвісу. На 4 красавіка спецыялістамі райЦГЭ у ходзе планавых, пазапланавых праверак і маніторынгам ахоплена 66 аб’ектаў (74,2%). З іх прадпрыемстваў гандлю – 48, грамадскага харчавання – 12, прыдарожнага сэрвісу -6. - Ці многа выяўлена парушэнняў санітарных нормаў? - На жаль, многа. Парушэнні санітарных нормаў, правілаў і гігіенічных нарматываў выяўлены на 55 аб’ектах: з іх 40 – гэта аб’екты гандлю, 10 – грамадскага харчавання, 5 – прадпрыемствы прыдарожнага сэрвісу. - І якія гэта парушэнні? - Працягваюць выяўляцца факты рэалізацыі прадукцыі са сцёкшым тэрмінам годнасці (захоўвання), парушэнняў тэмпературнага рэжыму і ўмоў захоўвання харчовай сыравіны, прадуктаў. Мае месца нездавальняючы стан памяшканняў, гандлёвага і тэхналагічнага абсталявання, прылягаючай тэрыторыі, адсутнасць поўнага камплекта санітарнай вопраткі. Па ўсіх фактах прымаюцца меры, у тым ліку адміністрацыйнага характару. - Колькі пратаколаў складзена? - 28 пратаколаў аб адміністрацыйным парушэнні на службовых асоб, накладзена 28 штрафаў на суму 4,8 мільёна рублёў. Накіраваны 42 прадпісанні аб ухіленні выяўленых парушэнняў. На паўторнае навучанне па гігіене накіравана 48 чалавек. Спецыялісты абласнога і раённага цэнтраў гігіены і эпідэміялогіі працягваюць кантраляваць аб’екты гандлю, прадпрыемствы грамадскага харчавання, прыдарожнага сэрвісу, рынкі. Агародніна ранняя, а ці бяспечная? - На рынку хутка наступіць сезон продажы свежай зеляніны, ранняй агародніны – ужо на прылаўках ёсць радыска. Наколькі можна быць упэўненым, што ўсё гэта небяспечна для здароўя? - Не дапускаецца да рэалізацыі раслінаводчая прадукцыя (сталовая зеляніна, агародніна, карані і клубні, фрукты і ягады) без дакументаў лабараторнага даследавання на яйкі гельмінтаў, цысты кішэчных патагенных прасцейшых, нітраты. Даведку аб даследаванні можна атрымаць у мікрабіялагічнай лабараторыі нашага цэнтра. На падставе яе адміністрацыя рынка дае дазвол на гандаль. Пры адсутнасці яго (даведкі) прадавец будзе адміністрацыйна пакараны. - А калі на паразіталагічным даследаванні вынік станоўчы? - Тады праводзіцца паўторны аналіз падвоенага аб’ёму прадукцыі, узятай з той жа партыі. Калі ж вынік зноў такі самы – гаспадару прадукцыі выдаецца прадпісанне аб спыненні рэалізацыі дадзенай партыі. Ці хутка прачнуцца кляшчы? - Па тэлебачанні перадаюць, што на Брэстчыне кляшчы ўжо актывізаваліся, ёсць выпадкі пакусаў людзей. А як у нас? - Пакуль што ніхто не звяртаўся з выпадку пакусаў кляшчамі. Аднак пры абследаванні тэрыторыі парку ў Вялікай Бераставіцы і каля возера ўстаноўлена іх наяўнасць. Кляшчы хутка прачнуцца, таму хацеў бы параіць быць уважлівымі ў час прагулак, паходаў у лес, на дачных участках. Напомню, у мінулым годзе па дапамогу з выпадку пакусаў кляшчоў, звярнулася 67 чалавек, у тым ліку 21 дзіця. Кляшчы – пераносчыкі шэрагу інфекцыйных захворванняў. Штогод у раёне рэгіструецца па два выпадкі хваробы Лайма, а ў 2010 годзе – два выпадкі энцэфаліту. Пра тое, як засцерагчы сябе ад кляшчоў, спецыялісты нашага цэнтра раскажуць на старонках газеты падрабязна. - Дзякую за гутарку, Іван Уладзіміравіч. Марыя Драпеза