8 красавіка сваё прафесійнае свята адзначаюць супрацоўнікі ваенных камісарыятаў - людзі, якія заўсёды на службе. Ваенныя камісарыяты з’яўляюцца выканаўцамі задач абарончага характару і неад’емнай часткай Узброеных Сіл Рэспублікі Беларусь. Менавіта з іх пачынаецца ваенная служба кожнага салдата і афіцэра, сюды звяртаюцца за дапамогай ваеннаслужачыя ў адстаўцы і ветэраны баявых дзеянняў, тут адбываецца адбор жадаючых атрымаць ваенную адукацыю. Ваенны камісарыят вырашае задачы мабілізацыйнай гатоўнасці і тэрытарыяльнай абароны, арганізуе прызыў грамадзян на тэрміновую ваенную службу і службу ў рэзерве, адбор кандыдатаў для паступлення ў ваенныя навучальныя ўстановы, забяспечвае сацыяльную абарону ваеннаслужачых –пенсіянераў і многае іншае. Усе гэтыя задачы аператыўна, якасна і паспяхова выконвае і Бераставіцкі раённы ваенны камісарыят. Па сваіх паказчыках ён знаходзіцца на адным з першых месцаў у вобласці. І гэта не выпадкова, а дзякуючы добрасумленным адносінам да выканання службовых абавязкаў супрацоўнікаў райваенкамата. 3 афіцэры і 13 чалавек грамадзянскага персаналу – гэта калектыў аднадумцаў, які паспяхова вырашае пастаўленыя задачы. Гэта пацвердзіла і праверка камісіі Галоўнага арганізацыйна-мабілізацыйнага ўпраўлення Генеральнага Штаба Узброеных Сіл Рэспублікі Беларусь, якая праходзіла ў мінулым годзе. Па яе выніках работа райваенкамата ацэнена на “добра”. Яшчэ адно сведчанне зладжанай і паспяховай працы калектыву – дзяржаўная ўзнагарода, якую атрымаў кіраўнік камісарыята. У кастрычніку 2011 года раённы ваенны камісар падпалкоўнік Сяргей Гішман Указам Прэзідэнта Рэспублікі Беларусь узнагароджаны медалём “За бездакорную службу” III ступені. Сяргей Уладзіміравіч падкрэслівае, што ў гэтым вялікая заслуга і ўсяго калектыву. Высокія прафесійныя якасці супрацоўнікаў райваенкамата, якія адказна і добрасумленна выконваюць сваю работу, дапамагаюць дабівацца добрых паказчыкаў. Адным са старэйшых супрацоўнікаў камісарыяту з’яўляецца Віктар Літвіновіч, намеснік ваеннага камісара. На ваеннай службе ён з 1985 года, а ў камісарыяце – з 1995. Маёр Літвіновіч арганізуе работу з мясцовымі органамі ўлады і арганізацыямі раёна па пытаннях улікова - прызыўной і мабілізацыйнай работы. Пытаннямі тэрытарыяльнай абароны займаецца другі намеснік ваеннага камісара – маёр Валерыян Сяргееў. Гэта адзін з важнейшых накірункаў дзейнасці ваеннага камісарыята, таму яму ўдзяляецца асаблівая ўвага. Адзначае раённы ваенны камісар і добрасумленную працу спецыяліста па сацыяльнай абароне і пенсійнаму забеспячэнню ваеннаслужачых Ларысы Жукоўскай і галоўнага спецыяліста па прызыву Сяргея Чарнова, ускладвае надзеі на маладога супрацоўніка райваенкамата тэхніка Дзмітрыя Карповіча, які вядзе ўлік і прызначэнне транспартных сродкаў для патрэб мабілізацыі. Напярэдадні прафесійнага свята ў калектыве з асаблівай удзячнасцю ўспамінаюць ветэранаў А.А.Далініна, Ю.В.Кулікова, М.М.Дудкіну, Т.У.Хмуровіч, М.М.Марцёна, якія многа гадоў адпрацавалі ў ваенкамаце. Ды і наогул, па словах Сяргея Гішмана, кожны з супрацоўнікаў райваенкамата ўносіць значны ўклад у агульную справу вырашэння дзяржаўных задач, ад якіх у значнай ступені залежыць абароназдольнасць нашай дзяржавы. Ірына МІКЛАШ, фота аўтара