З 10 ліпеня ў лагер прыехалі на адпачынак 134 хлопчыкі і дзяўчынкі. Як заўсёды, тут іх чакае яркая і насычаная праграма, так што сумаваць або проста сядзець без справы не прыйдзецца! Нездарма ж назва праекта змены — “Акадэмія творчасці”! Старшая выхавацельніца лагера Ірына Вячаславаўна Руткоўская асабліва адзначвае, што па задумцы арганізатараў адпачынку ўпор у гэтай змене рабіўся на развіццё творчых схільнасцей дзяцей і падлеткаў, таму тут дзейнічаюць самыя розныя гурткі, ды і конкурсы — адпаведных напрамкаў. Добрай традыцыяй стала і супрацоўніцтва з раённымі аддзеламі ўнутраных спраў і па надзвычайных сітуацыях: іх супрацоўнікі клапоцяцца пра бяспеку дзяцей на адпачынку, а таксама праводзяць сумесныя мерапрыемствы. Не застаўся ў баку і мясцовы кінавідэапракат. “Бяспечнае лета” Вялікую хвалю пазітыўных эмоцый выклікала ў хлопчыкаў і дзяўчынак, якія адпачывалі ў лагеры ў першую змену, акцыя “Бяспечны свет”. Яе арганізавалі і правялі супрацоўнікі райаддзела па надзвычайных сітуацыях. Як паведаміў “Дамавічку” інспектар групы прапаганды і навучання Бераставіцкага РАНС Яўген Шапавалаў, гэтая акцыя ладзіцца, каб забяспечыць пажарную бяспеку дзяцей на працягу канікулаў і засцерагчы іх ад магчымых непрыемнасцей. Падчас мерапрыемства выратавальнікі паказвалі відэа- і мультыплікацыйныя фільмы на тэму папярэджвання пажараў і іншых надзвычайных сітуацый, дэманстравалі магчымасці пажарнай аварыйна-выратавальнай тэхнікі, інструментаў і сродкаў аховы. Асобныя ж смельчакі нават прымералі на сабе спецыяльны цеплаадбівальны касцюм! Застаецца дадаць, што такія акцыі будуць праводзіцца ў кожную лагерную змену. А яшчэ, спадзяюся, на канікулах вы не закінулі кніжкі як мага далей і знаходзіце час, каб пачытаць прыгодніцкі раман або пагартаць старонкі маляўнічай энцыклапедыі. Вось і “Дамавічок” спяшаецца падзяліцца з вамі некаторымі цікавымі фактамі са старонак каляровай энцыклапедыі “Краіны свету”. Цi ведаеце вы, што… …У Аўстраліі можна ўбачыць дарожны знак “Тут пераходзіць дарогу каала”. Каалу, ці сумчатага мядзведзя, яшчэ называюць эўкаліптавым мядзведзем. Тоўстае нязграбнае цельца звярка з неразвітым хвосцікам, пакрытае густым мехам, дасягае 60 см у вышыню. Вушы каалы вялізныя, пушыстыя. Жывуць жывелы на эўкаліптах, кормяцца іх лісцем. …Статую Свабоды Злучаным Штатам Амерыкі падаравала Францыя ў 1886 г. як сімвал дружбы і супрацоўніцтва, а таксам як сімвал свабоды і новых магчымасцяў для эмігрантаў, якія прыбывалі ў гавань Нью-Ёрка. …Цюльпан — сімвал Нідэрландаў. У 1637 г. тры цыбуліны гэтай кветкі былі прададзеныя за 30 тысяч гульдэнаў — столькі грошай на той час у Амстэрдаме каштаваў цэлы дом! Сёння на выставу цюльпанаў у Кёппенхофе прыходзіць да мільёна наведвальнікаў. … Яшчэ адным сімвалам Нідэрландаў з’яўляюцца драўляныя башмакі — кломпы. Вырабляюць іх на старадаўніх станках, матэрыялам часцей за ўсё становіцца топаль, прычым на апрацоўку загатоўкі патрэбны ўсяго некалькі хвілін. Затым пара кломпаў павінна сохнуць на працягу некалькіх тыдняў пры пэўнай тэмпературы, каб не з’явіліся трэшчыны. …Толькі аргенцінцы ўмеюць танцаваць танга па-сапраўднаму. Яго танцуюць нават на вуліцах! Узнікшы ў трушчобах Буэнас-Айрэса, гэты танец напачатку ХХ стагоддзя распаўсюдзіўся па ўсім свеце. Падрыхтавала Вікторыя Дзержановіч