Стаўшы ўжо традыцыйным раённы маладзёжны турыстычны злёт у чарговы раз сабраў сваіх прыхільнікаў у лясным масіве аг.Пагранічны. 28-30 чэрвеня, на тры дні пакінуўшы свае працоўныя кабінеты і камфортныя хатнія ўмовы, маладыя людзі з прадпрыемстваў і арганізацый раёна акунуліся ў жыццё сапраўдных турыстаў. Ночы ў палатцы, ежа, прыгатаваная на кастры, і цэлы шэраг спартыўных выпрабаванняў, якія чакалі на працягу ўсіх дзён турзлёту, – гэта сапраўдная рамантыка для моцных духам і целам. А такіх маладых людзей, як аказалася, на Бераставіччыне нямала. Сёлета ўдзел у турыстычным злёце прынялі 12 каманд: іх прадставілі практычна ўсе сельскагаспадарчыя прадпрыемствы (за выключэннем АФ “Стары Дворац”), ААТ “Бераставіцкая ПМК-141”, ЦРБ, аддзел адукацыі райвыканкама і Бераставіцкі РЭС. Надвор’е, якое перад гэтым палохала турыстаў дажджамі і прахалодай, стабілізавалася і падарыла на час мерапрыемства цёплыя і сонечныя дні. Першы дзень турзлёту каманды распачалі спаборніцтвамі па валейболе, перацягванню каната, гульнёй “Гарады”, вечарам іх чакаў яшчэ конкурс “Быт турыста” з прадстаўленнем жартоўнага турыстычнага меню. Першае месца ў найбольш відовішчных спаборніцтвах па перацягванні каната заняла каманда СВК “Малабераставіцкі элітгас”, другое – СВК “Цецяроўка”, трэцяе – РУСП “Масаляны”. У спаборніцтвах па валейболе лепшымі сталі каманды СВК “Малабераставіцкі элітгас”, СВК імя Варанецкага і СВК “Цецяроўка”. У гульні “Гарады” перамогу атрымала каманда СВК “Малабераставіцкі элітгас”, другое месца заняла каманда СПП “АграМір”, трэцяе – каманда СВК ”Пархімаўцы”. Другі дзень турыстычнага злёту быў яшчэ больш насычаным і цікавым. Каманды чакалі спаборніцтвы па падняццю гіры, падцягванню, дартсу, распілоўцы бервяна, турыстычная паласа перашкод і конкурс турыстычнай песні. Першае месца ў падняцці гіры заняў Віталій Піваварчык з СВК імя Варанецкага, другім стаў Мікалай Кармазын з СВК “Пархімаўцы”, трэцім – Анатолій Пашкевіч з СВК “Малабераставіцкі элітгас”. У падцягванні мацнейшымі аказаліся Уладзімір Габрусевіч (аддзел адукацыі райвыканкама), Яўгеній Цюшкевіч (СВК “Пархімаўцы”) і Мікалай Болзан (РУСП “Масаляны”). Спаборніцтвы па дартсу выявілі самых меткіх турыстаў. Сярод жанчын імі сталі Крысціна Цан (СВК “Малабераставіцкі элітгас”), Вольга Пабядзінская (ААТ “Бераставіцкая ПМК-141”) і Анжаліка Барцэвіч (СВК “Макараўцы”). Сярод мужчын у гэтым конкурсе перамогу атрымалі Сяргей Рэйшаль (СВК “Малабераставіцкі элітгас”), Дзмітрый Данільчык (РУСП “Масаляны”) і Валянцін Жывель  (СВК “Цецяроўка”) . Многа выпрабаванняў чакала каманды і на турыстычнай паласе перашкод. Найлепш з імі справіліся прадстаўнікі аддзела адукацыі райвыканкама, Бераставіцкай ЦРБ і СВК “Пархімаўцы”. У спаборніцтвах па распілоўцы бервяна першае месца заняла каманда СВК “Малабераставіцкі элітгас”, другое – СВК “Пархімаўцы”, трэцяе – СВП “АграМір”. Найбольш ярка выканалі турыстычную песню каманды РУСП “Масаляны”, аддзела адукацыі райвыканкама і СВК “Цецяроўка”. Трэці дзень турзлёту закончыўся спаборніцтвамі па армрэслінгу, у якіх перамогу атрымалі Андрэй Каржанеўскі (СВК “Цецяроўка”), Юрый Труш (аддзел адукацыі райвыканкама) і Аляксандр Садаўнічы (СВК “Малабераставіцкі элітгас”), і конкурсам сценгазет. Лепшыя сценгазеты прадставілі каманды аддзела адукацыі райвыканкама, СВК “Цецяроўка”, ААТ “Бераставіцкая ПМК -141”. У конкурсе “Быт турыста” перамогу атрымалі каманды СВК “Алекшыцы”, СВК “Макараўцы” і СВК “Цецяроўка”. Па выніках усяго турыстычнага злёту пераможцам стала каманда СВК “Малабераставіцкі элітгас”, другое месца – у каманды СВК “Цецяроўка”, трэцяе месца занялі прадстаўнікі аддзела адукацыі райвыканкама. Пераможцы і прызёры турыстычнага злёту, а таксама асобных відаў спаборніцтваў атрымалі граматы РК ГА “БРСМ” і падарункі аддзела па справах моладзі райвыканкама. Каманда СВК “Малабераставіцкі элітгас” прадставіць наш раён на абласным турыстычным злёце. Ірына МІКЛАШ, фота аўтара