Месцам для раённага семінара па ўзнаўленні статка СВК “Цецяроўка” быў выбраны невыпадкова. Тут працуе самы новы ў раёне малочнатаварны комплекс “Рудаўляны”. І калі адразу пасля яго запаўнення сярэднясутачны надой ад каровы быў невялікі, што звязана было са стрэсам у жывёлы ад перанасялення, дык зараз гэты паказчык дасягнуў 17,8 кілаграма, што ўжо набліжаецца да сярэднераённага. Да гонару нашых вытворцаў можна дадаць, што яшчэ ёсць вельмі шмат раёнаў у рэспубліцы, дзе дояць і менш 8 літраў... На жаль, і тыя, хто амаль ў сярэдзіне рэйтынгу, дабраліся толькі да дзесяці кілаграмаў. Затое вельмі прыемна бачыць, што Бераставіччына ў лідарах па рэспубліцы. Нашы аграрыі не спыняюцца на дасягнутым, яны стараюцца паляпшаць вынікі, працуюць над якасцю малака. Удзельнікі раённага семінара былі задаволеныя тым, што ім давялося ўбачыць. Магчыма, у Гро-дзенскай вобласці такі вопыт ёсць, а ў раёне ўпершыню з’явіліся групавыя домікі для цялят. Яны нагадваюць сапраўдныя шатры, вельмі функцыянальныя і зараз рыхтуюцца да эксплуатацыі. З навінак можна назваць таксама спецыяльнае абсталяванне для кароў. З яго дапамогай рэгіструецца рухавая актыўнасць для выяўлення жывёлы ў ахвоце. А пра ўвесь тэхналагічны працэс расказала ўдзельнікам семінара выконваючая абавязкі галоўнага заатэхніка Алена Нікановіч. Дойны статак на новым комплексе рассартаваны з улікам надояў. Высокаўдойныя каровы ўтрымліваюцца ў асобных секцыях, дояцца тры разы, для іх арганізаваны і лепшы рацыён. Кармленне жывёлы збалансаванае. Як вядома, малако ў каровы “на языку”, таму гэтай праблеме надаецца належная ўвага Ёсць на гэтым малочнатаварным комплексе новае і ў даенні кароў. Вельмі добра, што даільныя шклянкі аўтаматычна дэзынфіцыруюцца пасля кожнага чарговага выхаду рагуль, што зніжае верагоднасць перадачы бактэрый. Праца аператара машыннага даення на новым абсталяванні значна лягчэйшая, чым раней. Валянціна Андрушэвіч і Святлана Шаўчэнка задаволены, што заняты менавіта тут. Добры настрой дапамагае ім дабівацца важкіх вынікаў, а наперадзе яшчэ больш сур’ёзныя задачы. Трэба не толькі павялічваць валавую вытворчасць, але звярнуць увагу на якасць малака. Мець сыравіну гатункам “экстра” — рэальна для новага комплексу. Будзем чакаць, што менавіта так і будзе. Наведалі ўдзельнікі семінара таксама ферму “Грыцавічы”, дзе ўтрымліваюцца цялушкі для ўзнаўлення статка. З трохмесячнага ўзросту яны там знаходзяцца да пакрыцця. Тэхналогіі захоўваюцца. А за май сярэднясутачная прывага склала 800 грамаў. На здымках: Алена Нікановіч расказвае пра арганізацыю вытворчасці; Валянціна Андрушэвіч і Святлана Шаўчэнка. Ніна Наддэ, фота аўтара