Раённае свята, прымеркаванае да Міжнароднага дня абароны дзяцей, абяцала запомніцца маленькім бераставічанам вельмі насычанай забаўляльнай праграмай з шэрагам гульнявых пляцовак на самы розны густ і прысмакамі. Але неспрыяльнае надвор’е ўнесла свае карэктывы… Пятнічным адвячоркам юныя гаспадары свята (хто з сябрамі, а хто — з бацькамі) сабраліся ў актавай зале рённага Дома культуры. Прыстасоўваючыся да капрызаў надвор’я, арганізатары мерапрыемства — аддзелы адукацыі і культуры райвыканкама — былі вымушаны “перанесці” запланаваную праграму з амфітэатра ў ДК. Перад пачаткам канцэрта самыя азартныя маглі паспрабаваць удачу ў бяспройгрышнай латарэі, арганізаванай філіялам аблспажыўтаварыства. Іншыя ж частаваліся поп-корнам або свежым печывам. Актывісты Беларускага рэспубліканскага саюза моладзі праводзілі акцыю па зборы дабрачынных ахвяраванняў на патрэбы дзяцей-інвалідаў. Напачатку мерапрыемства намеснік старшыні райвыканкама Сяргей Чыкун павіншаваў юных бераставічан, іх бацькоў і педагогаў са святам. Прадстаўнікі розных устаноў і арганізацый раёна былі адзначаны за актыўную абарону інтарэсаў дзяцінства падзячнымі лістамі. Іх уручыла начальнік аддзела адукацыі райвыканкама Алена Буткевіч. Раённае аддзяленне рэспубліканскага ГА “Беларускі дзіцячы фонд” паклапацілася аб тым, каб стварыць свята ў прыёмных сем’ях. Дырэктар фонду Наталля Кудлаш уручыла ім пакеты з падарункамі. Прадстаўнікі аддзялення ААТ “Белаграмбанк” у рамках акцыі “Расти большой” зрабілі падарункі дзеткам, якія святкавалі свой Дзень нараджэння ў маі і чые бацькі з’яўляюцца ўкладчыкамі банка. Са святам 90-годдзя піянерыі павіншавала ўсіх Таццяна Таберка, а лепшыя агітбрыгады раёна паказалі свае выступленні. Супрацоўнікі ЦБУ №401 “Беларусбанка” правялі сярод юных гледачоў розыгрыш латарэі. Шчасліўчыкі атрымалі ад іх пакеты з прызамі. Падарункі і сюрпрызы ад дарослых чаргаваліся з музычнымі нумарамі ў выкананні вучняў школ раёна. Напрыканцы мерапрыемства ўсе жадаючыя мелі магчымасць сфатаграфавацца з роставымі лялькамі на памяць аб гэтым свяце. Вікторыя ДЗЕРЖАНОВІЧ, фота аўтара