Дзяцінства называюць шчаслівай і бесклапотнай парой, аднак, на жаль, тысячы дзяцей не могуць спаўна цешыцца ім. Цяжкія хваробы, інваліднасць, пакінутасць і сацыяльнае сіроцтва азмрочваюць дзяцінства, прыносяць боль і смутак у дзіцячыя сэрцы. Падтрымаць і ўнесці светлыя моманты ў жыццё пакрыўджаных лёсам дзяцей прызвана абласная дабрачынная акцыя “Анёл у тваім сэрцы”, якая праходзіць на Гродзеншчыне ў сакавіку - маі гэтага года. Адна з асноўных яе мэт - збор сродкаў для дапамогі дзецям, якія патрабуюць асаблівай увагі і клопату. На Бераставіччыне да яе далучыліся самыя разнастайныя структуры, пачынаючы ад органаў улады, прадпрыемстваў і ўстаноў раёна, грамадскіх аб’яднанняў, рэлігійных канфесій і заканчваючы школьнікамі і навучэнцамі. Як паведаміла дырэктар раённага ад-дзялення Беларускага дзіцячага фонду Наталля Кудлаш, за час акцыі ў раёне было сабрана амаль сем мільёнаў рублёў. Практычна ўсе працоўныя калектывы ўключыліся ў дабрачынны збор сродкаў для дзяцей. Словы асаблівай удзячнасці за найбольшы ўклад у агульную справу Наталля Міхайлаўна выказвае калектывам устаноў адукацыі, раённаму аддзелу па надзвычайных сітуацыях, РАУС, ААТ “Бераставіцкая ПМК-141”, РЭС, аддзелу культуры райвыканкама, райфінаддзелу, СВК “Макараўцы” і “Пархімаўцы”, раённаму выканаўчаму камітэту. Сабраныя падчас акцыі сродкі адразу накіроўваліся на дабрачынныя мэты. Была аказана дапамога Цэнтру карэкцыйна - развіваючага навучання і рэабілітацыі г.п.В.Бераставіца на набыццё камп’ютара на суму 500 тысяч рублёў, дзецям - інвалідам, якія знаходзяцца на індывідуальным навучанні, былі набыты спецыяльныя падарункі. Напрыклад, Аляксандр Салама атрымаў сокавыціскалку на суму звыш 400 тысяч рублёў, а Вераніка Пачобут – камплект пасцельнай бялізны і пуховую коўдру, таксама на суму звыш 400 тысяч рублёў. 25 мая на базе Ваўкавыскага дзіцячага дома прайшло выязное пасяджэнне клуба прыёмных бацькоў “Семейный очаг”, арганізаванае за кошт сродкаў раённага аддзялення Беларускага дзіцячага фонду. На ім прысутнічалі прыёмныя бацькі, выхаванцы Бераставіцкага сацыяльнага прытулку і дома сямейнага тыпу Артамонавых. Для ўсіх дзяцей былі набыты салодкія пачастункі, а выхаванцы Ваўкавыскага дзіцячага дома атрымалі ў падарунак ад гасцей 3 футбольныя мячы на суму 300 тысяч рублёў і настольную гульню. Таксама раённае аддзяленне Беларускага дзіцячага фонду запланавала зрабіць радасным і запамінальным свята да Міжнароднага дня абароны дзяцей, якое адбудзецца ў гарадскім пасёлку 1 чэрвеня. Для яго арганізацыі і правядзення ўжо набыты падарункі на суму звыш трох мільёнаў рублёў, якія парадуюць маленькіх гасцей мерапрыемства. Ірына МІКЛАШ