Дамы рамёстваў, якія дзейнічаюць у кожным раёне рэспублікі, з’яўляюцца не толькі цэнтрамі адраджэння беларускіх традыцыйных промыслаў, але і месцам творчай самарэалізацыі народных майстроў, вырабы якіх сёння адрозніваюцца не столькі практычнасцю, колькі мастацкасцю, эстэтычнасцю, служаць свайго роду ўзорамі нацыянальнага сувеніра. Дарэчы, праблеме захавання традыцый і развіцця новых відаў народных промыслаў і рамёстваў у сучасных умовах фарміравання нацыянальнай культуры, а таксама стварэнню асобных турыстычных зон у нашай краіне на працягу апошніх гадоў надаецца значная ўвага.
Больш канкрэтныя дзеянні прадпрымаліся, у прыватнасці, у мінулым годзе, аб’яўленым на Беларусі ЮНЕСКА Годам культурнага турызму і спадчыны. Распрацоўваліся і ўкараняліся ў жыццё шляхі прыцягнення ўвагі як жыхароў нашай краіны, так і замежных гасцей да культурных здабыткаў беларусаў і спрыяння таму, каб да нас прыязджала ўсё больш і больш турыстаў. Да справы гэтай далучыліся і народныя майстры, без выстаў вырабаў якіх сёння не абыходзіцца амаль ніводнае культурна-масавае мерапрыемства. Дарэчы, на Гродзеншчыне адным з крокаў у плане папулярызацыі народнай дэкаратыўна-прыкладной творчасці і знаёмства турыстаў з самабытнай беларускай культурай сталі наладжаныя ў мінулым годзе па рашэнні калегіі ўпраўлення культуры аблвыканкама выставы-продажы вырабаў Дамоў рамёстваў вобласці на пляцоўцы каля маладзёжнага цэнтра па вуліцы Савецкай у Гродне. Другое лета запар у гэтым праекце ўдзельнічае і Бераставіцкі Дом рамёстваў. Яго дырэктар Тамара Касьян на здымку ў цэнтры), метадыст-майстар Алена Мацейка і кіраўнік гуртка Наталля Галавач (прадстаўлялі саламяныя вырабы, прадметы вузельчыкавага пляцення, роспіс па дрэве, дробную кераміку, праводзілі там майстар-класы.
Цікавым для работнікаў Бераставіцкага Дома рамёстваў стаў удзел у адкрытым абласным свяце “Ружанская брама”, якое праводзілася ў чэрвені на Брэстчыне трэці раз з мэтай папулярызацыі аб’ектаў гісторыка-культурнай спадчыны. Дарэчы, у рамках свята там праходзіў пленэр разьбяроў па дрэве, якія выраблялі манументальную скульптуру, прысвечаную беларускаму магнацкаму роду Сапегаў, уладальнікаў Ружанскага палаца. Была прадстаўлена шырокая канцэртная праграма, у тым ліку і замежных калектываў, наладжаны святочны кірмаш і выстава-продаж вырабаў народных майстроў з розных куточкаў Беларусі. А ўсё таму, што музей “Ружанскі палацавы комплекс Сапегаў” плануецца зрабіць аб’ектам будучага турыстычнага маршруту “Залатое кола Беларусі”, распрацоўка якога запланавана Нацыянальнай праграмай развіцця турызму на 2011-2015 гады.
Дэманстрацыя магчымасцей уключэння элементаў нематэрыяльнай культуры ў турыстычныя маршруты стала адной з мэт упершыню праведзенага ў жніўні рэгіянальнага фестывалю абрадаў і рамёстваў “Скарбы Гродзеншчыны”. У фестывалі, які праходзіў у Лідзе і Гудзевічах, удзельнічалі майстры народнай творчасці раённых Дамоў рамёстваў і фальклорныя калектывы Гродзеншчыны, майстры Брэсцкай вобласці і Падляскага ваяводства Рэспублікі Польшча. Быў прадстаўлены і наш раён – з фальклорнай, сюжэтна-гульнявой праграмамі і выставай дэкаратыўна-прыкладных вырабаў Бераставіцкага Дома рамёстваў. Дырэктар гэтай установы Тамара Касьян, як адзін з лепшых майстроў па саломапляценні вобласці, правяла майстар-клас па гэтаму віду традыцыйнага народнага рамяства. У рамках фестывалю сярод рамеснікаў праводзіўся конкурс па шэрагу намінацый. Прыемна адзначыць, што Бераставіцкі Дом рамёстваў па выніках экспертнай камісіі на чале са старшынёй Беларускага саюза майстроў народнай творчасці, прафесарам, доктарам мастацтвазнаўства Яўгенам Сахутам быў узнагароджаны дыпломам у намінацыі “лепшая калекцыя выставачных работ традыцыйных рамёстваў”.
Сярод найбольш значных масавых мерапрыемстваў Гродзеншчыны, дзе сёлета давялося пабываць работнікам Бераставіцкага Дома рамёстваў з выставамі, варта адзначыць адкрыты фестываль польскай культуры і побыту “Эйсмантаўскі фэст”, адроджаны дзеля захавання традыцый і гісторыі “Ганненскі кірмаш” у Зэльве, а таксама XV Міжрэгіянальную ўніверсальную выставу-кірмаш “Еўрарэгіён “Нёман”-2013”.
Цяпер жа калектыў уключыўся ў творчае спаборніцтва, аб’яўленае Гродзенскім абласным метадычным цэнтрам народнай творчасці паміж Дамамі рамёстваў вобласці, за стварэнне лепшай сувенірнай прадукцыі і прадставіў да ўдзелу ў конкурсе дэкаратыўныя сувеніры ў выглядзе вявёркі – сімвала Вялікай Бераставіцы. Вынікі конкурсу стануць вядомыя пазней. Аднак задумацца над стварэннем сувенірнага брэнду нашага пасёлка ўжо варта. Замежныя госці ў нас бываюць усё часцей. А з адкрыццём Музея Вавёркі ў Вялікай Бераставіцы, які, дарэчы, уключаны ў турыстычны маршрут Гродзеншчыны, іх, трэба меркаваць, стане яшчэ больш. І што як ні прыгожыя вырабы ручной работы з нацыянальнай адметнасцю і мясцовым каларытам могуць стаць цудоўным сувенірам з Бераставіцы.
Святлана Ганчарова, фота аўтара
Дамы рамёстваў, якія дзейнічаюць у кожным раёне рэспублікі, з’яўляюцца не толькі цэнтрамі адраджэння беларускіх традыцыйных промыслаў, але і месцам творчай самарэалізацыі народных майстроў, вырабы якіх сёння адрозніваюцца не столькі практычнасцю, колькі мастацкасцю, эстэтычнасцю, служаць свайго роду ўзорамі нацыянальнага сувеніра. Дарэчы, праблеме захавання традыцый і развіцця новых відаў народных промыслаў і рамёстваў у сучасных умовах фарміравання нацыянальнай культуры, а таксама стварэнню асобных турыстычных зон у нашай краіне на працягу апошніх гадоў надаецца значная ўвага.