Вакальная група ўзорнага дзіцячага хору “Манжэрок” Бераставіцкай дзіцячай школы мастацтваў стала ўладальнікам дыплома ІІІ ступені абласнога конкурсу імя К.Горскага сярод навучэнцаў дзіцячых музычных школ і школ мастацтваў. Конкурс гэты дастаткова прэстыжны, са сваёй гісторыяй і традыцыямі. Ён праводзіцца ў Лідскім музычным каледжы, пачынаючы з 1995 года. З 2007 года мае статус абласнога. Месца правядзення мерапрыемства выбрана невыпадкова: менавіта лідская зямля дала свету знакамітага кампазітара, скрыпача і канцэртмайстара Канстанціна Горскага, які жыў у Польшчы і быў вядомы як выдатны саліст-віртуоз. Аднак для яго ўсё пачыналася ў глыбінцы, як, дарэчы, гэта адбываецца і цяпер. Менавіта на перыферыі растуць і сталеюць таленты. Напэўна, Канстанцін Горскі быў бы вельмі ўражаны, наколькі многа сёння таленавітых хлопчыкаў і дзяўчынак. Для многіх з удзельнікаў конкурс стаў сапраўдным штуршком для далейшай творчай дзейнасці, даў магчымасць працягнуць адукацыю ў Лідскім дзяржаўным музычным каледжы, музычных ВНУ краіны і за яе межамі. Трэба адзначыць, што намінацыя “вакальны ансамбль”, у якой выступалі нашы юныя артысты, не ўключалася ў конкурс на працягу апошніх дзесяці гадоў. Сёлета гэтую намінацыю было вырашана адрадзіць. Каля 30 калектываў дэманстравалі сваё вакальнае і сцэнічнае майстэрства, выразнасць і эмацыянальнасць выканання, якасць падрыхтаванага рэпертуару і ансамблевага гучання вакалу. Прычым абмежаванняў па ўзросту не было: на раўных спаборнічалі і вучні малодшых класаў, і старшакласнікі. А гэта, згадзіцеся, дастаткова складана. Бераставіцкія юныя вакалісты пакарылі членаў журы і слухачоў у зале сваёй асаблівай артыстычнасцю, эмацыянальнасцю, яркім і жывым выступленнем. Ды і ўзровень пеўчага выканання нашы юныя артысты прадэманстравалі належны. Невыпадкова граматай за высокае педагагічнае майстэрства ўзнагароджаны і кіраўнік узорнага дзіцячага хору “Манжэрок” Ірына Андрэеўна Серабракова. Менавіта яна – ідэйны натхняльнік калектыву. Вопытны і ініцыятыўны выкладчык выкарыстоўвае на занятках самыя разнастайныя методыкі і практыкаванні. А таму ўдзельнікі хору добра валодаюць асновамі правільнага дыхання, гукаўтварэння, артыкуляцыі. Ірына Андрэеўна падбірае арыгінальны і цікавы рэпертуар, які падабаецца і самім выканаўцам, і аўдыторыі. Вось і цяперашнія конкурсныя творы ў выкананні вакальнай групы сарвалі бурныя апладысменты і крыкі “Брава!” Святлана Ганчарова На здымку: удзельнікі вакальнай групы ўзорнага дзіцячага хору “Манжэрок” разам з кіраўніком хору Ірынай Серабраковай і канцэртмайстрам Галінай Архіпавай.