Не так даўно па электроннай пошце атрымаў з Польшчы некалькі цікавых фотаздымкаў, на якіх адлюстраваны фрагменты жыцця ў Вялікай Бераставіцы даваеннага перыяду (20-30-я гг. ХХ ст.). Фотаздымкі са свайго сямейнага альбома даслаў жыхар горада Торуня Анджэй Яфімаў-Лагада. Ён з’яўляецца ўраджэнцам нашага мястэчка (нарадзіўся тут 1944 годзе). Дзед Анджэя Уладзіслаў Лагада і яго жонка Ядзвіга былі да вайны ўладальнікамі мясной лаўкі і невялікай чарачнай, якія размяшчаліся на Рынку мястэчка. Бацька Анджэя ў 1941-1944 гг. працаваў ветэрынырам. У лістападзе 1944 года ён загінуў на фронце. Адразу пасля вайны сям’я Лагадаў выехала ў Польшчу і пражывае там да гэтага часу. Тым не менш, спадар Анджэй цікавіцца гісторыяй Вялікай Бераставіцы і рэгулярна чытае на сайце матэрыялы “Бераставіцкай газеты”. Сёння прапаную ўвазе чытачоў адзін з дасланых фотаздымкаў. Ён быў зроблены ў 30-я гады мінулага стагоддзя. На здымку група бераставіцкай моладзі стаіць на беразе Бераставічанкі каля “гарбатага” моста (з боку сучаснага масласырзавода). У цэнтры групы стаіць Гелена Лагада. Побач з ёю - маці Анджэя - Марыя Лагада, другі злева – яго хросны бацька Юзэф Лагада. Каля дрэва стаіць Вацлава Лагада. А на пярэднім плане сядзіць сын уладальнікаў Белага Дворка Юрэк Лэнпіцкі. На заднім плане здымка відаць бераставіцкае возера (пашыранае рэчышча Бераставічанкі) і яго правы бераг. На дальнім беразе праглядваецца будынак вадзянога млына Касакоўскіх, фотаздымак якога быў змешчаны ў адным з нядаўніх нумароў “Бераставіцкай газеты”. Сяргей Лушчык, г.Гродна