Большасць выпускнікоў школ на базе аграгарадкоў імкнуцца пасля заканчэння школы пераехаць у горад. Тады як дзяржава сёння робіць сур’ёзныя крокі насустрач тым, хто вырашыў звязаць сваё будучае з работай і жыццём у сельскай мясцовасці, у сельскай гаспадарцы.
На базе Старадварэцкай базавай школы 30 кастрычніка пачаў сваю працу “Горад майстроў”. Так называецца змена ў выхаваўча-аздараўляльнай установе адукацыі “САВІ”.
Чаму змена так называецца? Праблема выбару прафесіі актуальна заўсёды. Дапамагчы дзецям у разнастайнасці прафесій абраць хаця б накірунак, які ім бліжэй, задача выхавальнікаў нашага лагера.
План выхаваўчай работы пабудаваны так: атрымліваеш веды – выконваеш дзеянні. Гэта значыць, што выхавальнікі ў разнастайных формах знаёмяць выхаванцаў з прафесіямі: і віртуальныя падарожжы, і квэсты, і флэшбукі, і дзелавыя гульні, і многае іншае. Эфектыўнасць залежыць ад выбару выхавальнікамі сучасных форм і метадаў работы з дзецьмі. Менавіта ў лагеры можна выкарыстоўваць разнастайныя тэхналогіі, на рэалізацыю якіх не хапае ўрочнага часу.
Пасля знаёмства з прафесіямі ў атрадзе, дзеці адпраўляюцца знаёміцца практычна, на вытворчасць. Уразіла нашых выхаванцаў сустрэча з аграномам-хімікам аграфірмы “Стары Дворац” Пастушко Вадзімам Станіслававічам, якая прайшла ў першы дзень нашай змены. І вось што азначае цытата “Чалавек на сваім месцы”: Вадзім Станіслававіч так правёў экскурсію, што цяпер усе жадаюць быць аграномамі, калі ж на анкетаванні па выбары будучай прафесіі дзеці называлі, што жадаюць стаць пажарнымі, спявачкамі, настаўнікамі, аўтамеханікамі. Дзякуем, Вадзім Станіслававіч, поспехаў Вам у працы.
Наперадзе чакае яшчэ шмат экскурсій, мэта якіх даведацца плюсы і мінусы разнастайных прафесій, пазнаёміцца з людзьмі, якія прысвяцілі сваёй прафесіі жыццё. Будзем падрабязней знаёміцца з прафесіямі бацькоў, дзядуляў, бабуляў.
Мы ўжо атрымалі першыя водгукі ад бацькоў, якія задаволены ўражаннямі сваіх дзяцей і работай нашага Горада майстроў, работай нашых выхавальнікаў: Высоцкай М.А., Цімошка Г.І., Уцепяргенавай З.С., Якута В.А.
Работа выхаваўча-аздараўляльнай установы адукацыі, а прасцей кажучы лагера, з’яўляецца важнай састаўляючай адукацыйнай прасторы, якая спалучае ў сабе выхаванне, навучанне і развіццё асобы дзіцяці.
І галоўнае: вынікам работы нашага Горада майстроў стане не даясгненне аднолькавага выбару прафесій нашых выхаванцаў, а асобасны выбар кожнага, які адпавядае сілам, магчымасцям на шляху да выбару сваё будучыні.
Аксана Дзямідзік, дырэктар ВАУА “САВІ” Старадварэцкай базавай школы
