Напярэдадні Дня Незалежнасці Рэспублікі Беларусь і 79-й гадавіны вызвалення нашай краіны ад нямецка-фашысцкіх захопнікаў ветэраны Вялікай Айчыннай вайны, якія жывуць на Бераставіччыне, атрымалі матэрыяльную дапамогу ад раённага выканаўчага камітэта.
На жаль, людзей, якія набліжалі вызваленне беларускай зямлі ад нямецкай акупацыі, з кожным годам застаецца ўсё менш і менш. На сённяшні дзень у Бераставіцкім раёне пражывае толькі два ветэраны Вялікай Айчыннай вайны – працаўніца тыла Варвара Шультанава і партызанка Ганна Шышко. Напярэдадні свята да іх завіталі старшыня Бераставіцкага раённага Савета дэпутатаў Міхаіл Пісарык і старшыня раённага савета ветэранаў Алена Сілкова.
Міхаіл Віктаравіч падзякаваў ветэранам вайны за іх неацэнны ўклад у набліжэнне Вялікай Перамогі, за працу па аднаўленні краіны ў пасляваенныя гады, пажадаў моцнага здароўя, даўгалецця і ўручыў матэрыяльную дапамогу, выдзеленую са сродкаў мясцовага бюджэту.
Словы шчырай удзячнасці для жанчын-ветэранаў за магчымасць жыць пад мірным небам прагучалі і ад Алены Сілковай. Яна таксама павіншавала Варвару Паўлаўну і Ганну Міронаўну з галоўным святам краіны і ўручыла кветкі.
Дарэчы, да віншаванняў Варвары Шультанавай далучыліся і наведвальнікі аддзялення дзённага прабывання для інвалідаў Тэррытарыяльнага цэнтра сацыяльнай абароны насельніцтва Бераставіцкага раёна разам з загадчыкам Людмілай Магілевіч, якія прынеслі кветкі і падарунак, зроблены сваімі рукамі.
Ірына МІКЛАШ, фота аўтара
