21 лютага адзначаецца Міжнародны дзень роднай мовы.
Наш культурны код
Гэты дзень асаблівы для кожнай нацыі. Бо няма народа без мовы, няма мовы без яго носьбіта. Мы, беларусы, не выключэнне. Нам у спадчыну засталася ўнікальная мова – жывая і мілагучная, песенная і паэтычная. У сучасным свеце надзвычай важным з’яўляецца захаванне традыцыйных духоўных каштоўнасцей, выхаванне патрыятызму, які складае аснову жыццяздольнасці дзяржавы. І, вядома, гэта немагчыма без ведання гісторыі нашага народа, роднай мовы і культуры.
– Менавіта мова – адзін з найважнейшых складнікаў культурнага кода нацыі, – лічыць бібліятэкар Малабераставіцкай інтэграванай сельскай бібліятэкі Зоя Хлебнікава. – Вельмі важна навучыць сучаснае пакаленне з павагай ставіцца да беларускай мовы, а таксама на ёй размаўляць. А таму ў бібліятэцы мы сумесна з настаўнікамі імкнемся праводзіць мерапрыемствы на беларускай мове.
На сустрэчах у Малабераставіцкай бібліятэцы школьнікам заўсёды цікава. Зоя Якаўлеўна не проста рыхтуе розныя прэзентацыі і вечарыны на беларускай мове, але часта выкарыстоўвае для каларыту нацыянальны касцюм, старадаўнія прылады працы і прадметы побыту, унікальны арнамент на вышыўках, рушніках. Кніжна-ілюстрацыйныя выставы таксама афармляюцца ў беларускай стылістыцы. Такая нагляднасць дапамагае ў знаёмстве вучняў з моўнымі і культурнымі асаблівасцямі, якія вылучаюць нас сярод іншых народаў, з беларускім фальклорам і традыцыямі.
Цяпер у Малабераставіцкай інтэграванай сельскай бібліятэцы дзейнічае кніжная выстава “Размаўляй са мной па-беларуску”. На ёй прадстаўлены адаптаваныя для вучняў розных класаў выданні аб роднай краіне і мове, беларускай сімволіцы і выдатных мясцінах нашай Радзімы.
Выставы, гучныя чытанні, дыктоўкі
У перыяд святкавання Міжнароднага дня роднай мовы праходзіць Тыдзень роднай мовы. У гэты час ва ўстановах адукацыі Бераставіцкага раёна праводзяцца тэматычныя і выхаваўчыя гадзіны, конкурсы, літаратурныя святы, гасцёўні. Арганізуюцца экскурсіі ў краязнаўчыя і школьныя музеі. У бібліятэках пройдуць паэтычныя гадзіны, гучныя чытанні, урокі роднай мовы, кніжныя выставы. Настаўнікі і вучні традыцыйна прымуць удзел у рэспубліканскай дыктоўцы па беларускай мове, якую 21 лютага з 13.00 да 14.00 у рэжыме анлайн правядуць Інстытут мовазнаўства імя Якуба Коласа, Цэнтральная навуковая бібліятэка імя Якуба Коласа і канал «Культура» Беларускага радыё. Дарэчы, праверыць сваё валоданне роднай мовай можа любы жадаючы. Неабходна папярэдняя рэгістрацыя.
Адным з традыцыйных мерапрыемстваў з’яўляецца і масавы конкурс “Буслік”, які ўжо доўгі час ладзіць грамадскае аб’яднанне “Беларуская асацыяцыя “Конкурс”. У гульні-конкурсе ўдзельнічае шмат дзяцей па ўсёй краіне. Рыхтуючыся да “Бусліка”, яны з малога вучаць родную мову, цэняць і паважаюць яе.
Праваслаўная кніга – духоўная спадчына
Увесці падрастаючае пакаленне ў атмасферу жывога беларускага слова, далучыць яго да багацця роднай мовы, каб адчуць яе прыгажосць, мелодыку, своеасаблівасць, нам дазваляюць фальклорныя і лепшыя класічныя творы. А яшчэ – духоўная літаратура, якая ў старажытнасці першай атрымала распаўсюджанне. Сёлета 21 лютага ў Нацыянальнай бібліятэцы Беларусі па благаславенні Мітрапаліта Мінскага і Заслаўскага Веніяміна, Патрыяршага Экзарха ўсяе Беларусі, адбудзецца святкаванне Дня праваслаўнай кнігі. Гэтае свята – магчымасць нагадаць аб багацці духоўнай спадчыны, заключанай ў праваслаўных кнігах, аб мудрасці святых айцоў і падзвіжнікаў веры.
Для Беларусі ў гэтым годзе святкаванне Дня праваслаўнай кнігі спалучана з юбілейнымі датамі – 500-годдзем выдання «Апостала» Францыскам Скарынам, 900-годдзем заснавання Спаса-Еўфрасіньеўскага жаночага манастыра ў Полацку, 800-годдзем заснавання Свята-Елісееўскага Лаўрышаўскага мужчынскага манастыра, 555-годдзем з’яўлення Жыровіцкага абраза Божай Маці і 525-годдзем з’яўлення Мінскай іконы Божай Маці.
Святлана ГАНЧАРОВА
Фота аўтара
