Храмы – наша духоўная спадчына

Из истории земли Берестовицкой Культура Лента новостей

Сёння цікава вярнуцца на больш чым стагоддзе назад праз здымкі, якія здольныя данесці да нас дух эпохі, тагачасны выгляд помнікаў хрысціянскай культуры. У гэтым сэнсе бясцэннай крыніцай з’яўляецца творчасць фатографа-краязнаўцы Яна Балзункевіча, які зафіксаваў на працягу 1905-1914 гадоў хрысціянскія храмы Беларусі. У кнізе “Хрысціянскія храмы Беларусі на фотаздымках Яна Балзункевіча. Пачатак ХХ стагоддзя”, якая, дарэчы, ёсць у Бераставіцкай райбібліятэцы, утрымліваецца частка фатаграфічнай спадчыны Яна Балзункевіча. Большасць фотаздымкаў захоўваюцца ў аддзеле рэдкіх кніг і рукапісаў Цэнтральнай навуковай бібліятэкі імя Я. Коласа Нацыянальнай Акадэміі навук Беларусі. Арэал вандраванняў фатографа ахопліваў тэрыторыю Беларусі, Прыбалтыкі і Польшчы. Здымкі Балзункевіча дазваляюць уявіць выгляд храмаў напачатку ХХ стагоддзя і асэнсаваць тыя змены, якія яны спазналі. Прадстаўляем чытачам фотаздымкі шасці храмаў Бераставіччыны.

Касцёл Візітацыі Найсвяцейшай Панны Марыі

Касцёл Візітацыі Найсвяцейшай Панны Марыі пабудаваны ў 1615 годзе. У 1865 годзе будынак касцёла быў перададзены праваслаўным вернікам. У 1920 годзе касцёл зноў стаў каталіцкім. Працаваў да 1949 года. У сярэдзіне 1980-х рабілася спроба рэстаўрацыі касцёла. Але ў 1991 годзе адбыўся вялікі пажар, якія значна пашкодзіў будынак. Касцёл – помнік архітэктуры ранняга барока.

Храм Раства Прасвятой Багародзіцы аг. Масаляны

Масалянская царква Раства Прасвятой Багародзіцы пабудавана у 1796 годзе як уніяцкая царква, якая ў 1840-х гадах была пераўтворана ў праваслаўную. Гэта адзін з нешматлікіх храмаў Беларусі, які ніколі не зачыняўся. Царква ўяўляе сабой помнік архітэктуры позняга барока з элементамі класіцызму.

Храм Успення Прасвятой Багародзіцы в. Гольні

Сучасны будынак царквы Успення Прасвятой Багародзіцы ўзведзены з цэглы на месцы папярэдняй драўлянай царквы ў 1868 годзе. У 1902 годзе ён быў капітальна пашыраны дабудовай званіцы, а таксама падоўжных сцен.   У гады Вялікай Айчыннай вайны быў закрыты, а ў часы савецкай улады выкарыстоўваўся пад клуб. Па словах старажылаў в. Гольні, царква зведала тры пажары, але была адноўлена стараннямі прыхаджан. Помнік архітэктуры рэтраспектыўна-рускага стылю.

Храм Пакрова Прасвятой Багародзіцы аг. Алекшыцы

Царква Пакрова Прасвятой Багародзіцы пабудавана ў 1871 годзе паводле праекта архітэктара В. Міхаэліса ў эклектычным стылі з элементамі готыкі і праваслаўна-царкоўных канонаў. У 1963 годзе храм быў зачынены. Ён пачаў працаваць толькі  ў 1991 годзе. Гэта адзіная царква на Бераставіччыне, сцены ў якой распісаны сюжэтамі на рэлігійную тэматыку (у стылі Рублёва).

Храм Святога вялікамучаніка Дзмітрыя Салунскага аг. М. Бераставіца

Царква Святога вялікамучаніка Дзмітрыя Салунскага ў Малой Бераставіцы пабудавана ў 1866 годзе. Гэта помнік архітэктуры рэтраспектыўнага рускага стылю. За гады свайго існавання храм не прыцярпеў кардынальных змяненняў. Ён дзейнічаў як у часы нямецкай акупацыі, так і ў савецкі перыяд.

Касцёл Святога Антонія Падуанскага аг. М. Бераставіца

30 верасня 1851 года было распачата будаўніцтва мураванай святыні, якое завяршылася ў 1861 годзе.

Помнік архітэктуры позняга класіцызму з рысамі рэтраспектыўнага рускага стылю. У 1868-1919 гадах касцёл быў перададзены праваслаўнаму духавенству і перароблены пад царкву. З 1919 года храм зноў вернуты католікам. З прыходам савецкай улады ў 1939 годзе касцёл зачынілі. Але пасля Другой сусветнай вайны касцёл быў зарэгістраваны мясцовым ксяндзом Казімірам Мацкевічам, які праводзіў службу з 1945-га па 1947-ы год. У 1952 годзе касцёл быў знішчаны пажарам. Адноўлены ў пачатку 1990-х гадоў. Асвячэнне храма адбылося ў 1994 годзе.

Святлана Ганчарова. Фота аўтара



Добавить комментарий

Ваш адрес email не будет опубликован. Обязательные поля помечены *