Экспедыцыя “Дарога да святыняў” – у Бераставіцы

Духоўны сімвал Дня беларускага пісьменства — 22-я Міжнародная навукова-асветніцкая экспедыцыя “Дарога да Святыняў”, якая вырушыла з Мінска ў сёлетнюю сталіцу беларускага пісьменства горад Шчучын, 4 верасня зрабіла прыпынак у Вялікай Бераставіцы.
На мяжы Свіслацкага і Бераставіцкага раёнаў экспедыцыю сардэчна сустрэлі і запрасілі на бераставіцкую зямлю намеснік старшыні райвыканкама Сяргей Чыкун, начальнік аддзела ідэалагічнай работы, культуры і па справах моладзі райвыканкама Алена Ігнатовіч, благачынны Бераставіцкага благачыння пратаіярэй Сергій Шэлест і народны ансамбль народнай песні “Бераставіцкія музыкі”.
На ўрачыстым мітынгу на плошчы гарадскога пасёлка ўдзельнікаў экспедыцыі, якія прыбылі з Непагаснай Лампадай з Благадатным агнём ад Гроба Гасподняга і цудатворнай Загор’е-Сталавіцкай іконай Пакрову Прасвятой Багародзіцы, прывітаў старшыня Бераставіцкага райвыканкама Антон Кулісевіч, якія выказаў надзею, што прыезд экспедыцыі паслужыць умацаванню духоўнага патэнцыялу ўсіх жыхароў Бераставіччыны.
У знак далучэння бераставічан да агульнадзяржаўнага свята Дня беларускага пісьменства і своеасаблівага яднання ўсіх жыхароў Беларусі кіраўніку экспедыцыі пісьменніцы Ніне Загорскай была перададзена бераставіцкая зямля для закладкі Сада Малітвы ў Шчучыне.
Галоўны захавальнік Благадатнага Агню протаіерэй мінскага Свята-Духава кафедральнага сабора айцец Сергій Гардун падзякаваў бераставічанам за цёплую сустрэчу і нагадаў аб тым, што беларускае пісьменства і культура бярэ свой пачатак з хрысціянства, а духоўная экспедыцыя “Дарога да Святыняў” сведчыць аб еднасці святла Божага з ведамі, якія нясуць людзям навука і культура. Менавіта таму ў складзе экспедыцыі і святары, і навукоўцы, і літаратары, і журналісты. Дарэчы, удзельнікі экспедыцыі таксама гаварылі аб гэтым на своеасаблівых уроках пісьменства ў Бераставіцкай раённай бібліятэцы імя В.Кавалеўскага і Вялікабераставіцкай сярэдняй школе.
Затым экспедыцыя з Непагаснай Лампадай з Благадатным агнём ад Гроба Гасподняга і цудатворнай Загор’е-Сталавіцкай іконай Пакрову Прасвятой Багародзіцы разам са шматлікімі бераставіцкімі вернікамі рушыла хрэсным ходам да храма Свяціцеля Мікалая Цудатворцы на малебен.
У храме ў кожнага была магчымасць прыкласціся да цудатворнай Загор’е-Сталавіцкай іконы Пакрову Прасвятой Багародзіцы і запаліць сваю свечку ад Благадатнага агню ад Гроба Гасподняга, каб потым занесці яе дадому і асвяціць сваё жыллё гэтым агеньчыкам духоўнасці, веры і надзеі ў міласэрнасць Божую.
На завяршэнне сустрэчы ўдзельнікі экспедыцыі разам з прыхаджанамі па традыцыі пасадзілі ля храма Сад Малітвы, які на працягу многіх гадоў будзе жывым напамінкам пра гэта духоўнае мерапрыемства.
Ірына МІКЛАШ, фота аўтара