Семінар — нарада па ўзнаўленні статка прайшоў у Бераставіцкім раёне

Лента новостей

“Флагман пазіцый не здае…”–менавіта так выказаўся пра СВК імя Варанецкага першы намеснік начальніка ўпраўлення сельскай гаспадаркі і харчавання Бераставіцкага райвыканкама Павел Буткевіч. І сапраўды, першае ў гэтым годзе раённае мерапрыемства, семінар — нарада па ўзнаўленні статка адбылося 10 студзеня ў гаспадарцы, якая па вытворчасці малака нязменна ў лідарах сярод сельгаскааператываў вобласці і рэспублікі. І калі параўнаць, што ў мінулым годзе ў нашай краіне ў сярэднім атрымалі па 5 тысяч кілаграмаў малака ад каровы, дык у нашым раёне такі рубеж даўно ўзяты. Бераставіччына наблізілася да сямі тысяч, і можна спадзявацца, што і такая вышыня пакарыцца аграрыям. А СВК імя Варанецкага – на першым месцы ў раёне сярод сельгаскааператываў па надоі малака на карову за мінулы год. Надоена 8217 кілаграмаў, такім выдатным паказчыкам можна ганарыцца! Нездарма ў гэтую гаспадарку былі запрошаны спецыялісты, каб пераняць перадавы вопыт, і яны змаглі ўбачыць шмат цікавага.
У СВК імя Варанецкага два сучасных малочнатаварных комплексы – “Мацеевічы” і “Рымуцеўцы”, плануецца будаўніцтва трэцяга. Рэнтабельнасць вытворчасці малака за 11 месяцаў у гэтай гаспадарцы дасягнула 87%. А надаілі на карову на МТК “Мацеевічы” ў 2012 годзе на 432 кілаграмы больш, чым у 2011-ым, на МТК “Рымуцеўцы” – на 452. Вышэйшым гатункам і “экстрай” здадзена амаль 90% малака.
Удзельнікі семінара пабывалі на гэтых комплексах, паглядзелі сваімі вачамі, як тут па новых тэхналогіях вядзецца вытворчасць. Галоўны заатэхнік гаспадаркі Вікенцій Адамчук расказаў пра кармленне жывёлы ў розных групах, пра тое, як распрацоўваюцца збалансаваныя рацыёны. Кармоў нарыхтавана з запасам, яны добрай якасці. На адну ўмоўную галаву прыйшлося 36,5 цэнтнера кармавых адзінак, што на 4,3 больш, чым год раней. Жывёле даюцца вітамінна-мінеральныя дабаўкі. Адну з іх, на аснове патакі, вялікую і ў выглядзе “таблеткі” мы змаглі ўбачыць самі. Каровы яе ліжуць з задавальненнем.
Удзельнікі семінара ўбачылі, які парадак у памяшканнях. Рэгулярна праводзіцца дэзінфекцыя, тут добры мікраклімат, усё адпавядае патрабаванням. Нават непрыемнага паху амаль няма, што вельмі рэдка адзначыш пры наведванні жывёлагадоўчых аб’ектаў. А асаблівае ўражанне на спецыялістаў з іншых гаспадарак зрабіў мацыён кароў. Рух – гэта жыццё, ён такі ж карысны як чалавеку, так і жывёле. Напрыклад, на малочнатаварным комплексе “Мацеевічы” каровы кожны дзень праходзяць па паўтара кіламетры.
Галоўны ветурач Леанід Якусік расказаў пра папярэджанне захворванняў жывёлы і своечасовае эфектыўнае лячэнне. Работа нялёгкая – і ў мароз зімой, і ў спёку летам, але толькі ад здаровых кароў можна чакаць добрай аддачы.
У полі зроку жывёлаводаў СВК імя Варанецкага таксама выпайка малодзіва нованароджаным цялятам. Пасля нараджэння праз зонд ім даецца малодзіва, затым яны абсыхаюць пад спецыяльнымі лямпамі. Мне ўдалося “краем вока” ўбачыць бычкоў і цялушачак, на ножках некаторыя стаялі яшчэ “няцвёрда”, таму што нарадзіліся літаральна некалькі гадзін таму. Пасля таго, як яны пагрэюцца пад цёплымі лямпамі і абсохнуць, іх пераводзяць у індывідуальныя домікі. На выпадак маразоў там ёсць шторкі.
Пасля практычнай часткі семінара прайшоў абмен думкамі. Спецыялісты вельмі станоўча выказаліся пра той тэхналагічны ланцужок, які ўбачылі.
Пра дапамогу, якую зможа аказаць жывёлаводам Цэнтр генетыкі і селекцыі па Бераставіцкім раёне РУП “Гродзенскае племпрадпрыемства”, у прыватнасці, даследаванне кароў сучасным ультрагукавым сканерам, расказаў дырэктар Збігнеў Маціеўскі.
Сваю ацэнку работы ў жывёлагадоўлі за мінулы год выказаў Павел Буткевіч. Ён папрасіў аграрыяў і надалей падтрымліваць гонар раёна і працаваць так, каб гэта было выгадна і гаспадаркам, і ім самім.
Ніна Наддэ,
фота аўтара



Добавить комментарий

Ваш адрес email не будет опубликован. Обязательные поля помечены *