Бібліятэкары Гродзеншчыны дзяліліся вопытам

Лента новостей

Начальнік аддзела культуры Бераставіцкага райвыканкама Віталь Ляховіч, дырэктар Гродзенскай абласной бібліятэкі імя Карскага Лідзія Мальцава, начальнік упраўлення культуры Гродзенскага аблвыканкама Аляксандр Вярсоцкі і намеснік старшыні Бераставіцкага райвыканкама Сяргей Чыкун за размовай

Семінар абласнога ўзроўню бібліятэкары Бераставіцкай цэнтралізаванай бібліятэчнай сістэмы чакалі з хваляваннем: прымаць у сябе гасцей з усёй Гродзеншчыны —  справа адказная. Старанна рыхтаваліся, прадумвалі, на якіх акцэнтах бібліятэчнай дзейнасці засяродзіць увагу калег, каб даць ім найбольш поўнае ўяўленне аб сваёй рабоце.

Сустрэча бібліятэкараў Гродзеншчыны, а дакладней дырэктараў цэнтралізаваных бібліятэчных сістэм, адбылася 12 верасня ў абноўленым памяшканні райбібліятэкі. І сучасны выгляд бібліятэчнай установы пасля нядаўняга рамонту – гэта, бадай, першае, што прыемна здзівіла гасцей. Сярод іх былі начальнік упраўлення культуры Гродзенскага аблвыканкама А.Л.Вярсоцкі, галоўны спецыяліст упраўлення ўстаноў культуры і народнай творчасці Міністэрства культуры Рэспублікі Беларусь Н.І.Задзяркоўская, начальнік эканамічнага аддзела ўпраўлення культуры аблвыканкама Г.А.Багдзевіч, галоўны спецыяліст упраўлення культуры аблвыканкама Г.А.Сцяпанава, начальнік праектнага аддзела цэнтра міжнароднага супрацоўніцтва Гродзенскага дзяржуніверсітэта імя Янкі Купалы І.С.Ледчанкова, дырэктар Гродзенскай абласной бібліятэкі імя Карскага Л.В.Мальцава, а таксама польскія калегі – метадысты Падляскай ваяводскай бібліятэкі імя Л.Гурніцкага Ізабэла Шыманска і Гжэгож Кавальскі.

Падчас семінара

У чытальнай зале дзіцячай бібліятэкі адбылося адкрыццё семінара. З прывітальнымі словамі да яго ўдзельнікаў звярнуўся начальнік упраўлення культуры аблвыканкама А.Л.Вярсоцкі, які выказаў падзяку дырэктарам бібліятэк за выкананне асноўных паказчыкаў работы, а гаспадарам сустрэчы – за сумленную падрыхтоўку да семінара і цёплы прыём. Намеснік старшыні райвыканкама С.Я.Чыкун пазнаёміў гасцей з сённяшнім сацыяльна-эканамічным становішчам Бераставіччыны і падкрэсліў, што лепш убачыць усё на свае вочы. І выязная форма семінара якраз і прадастаўляе такую магчымасць.
Аб стане і перспектывах развіцця ўстаноў культуры Бераставіччыны расказаў начальнік аддзела культуры райвыканкама В.І.Ляховіч. А потым прадстаўнікам бібліятэк- удзельніц і пераможцам рэспубліканскага конкурсу “Бібліятэка – асяродак нацыянальнай культуры” былі ўручаны дыпломы і граматы Міністэрства культуры Рэспублікі Беларусь.
Безумоўна, бібліятэкары, у сілу сваёй прафесіі жадалі хутчэй пазнаёміцца з бібліятэкай. Дырэктар Бераставіцкй цэнтралізаванай бібліятэчнай сістэмы Т.Д.Марцішэвіч правяла гасцей па бібліятэчных пакоях, спыніўшыся на дзейнічаючых экспазіцыях, на новых праектах. Яна падзялілася з калегамі творчымі задумкамі, а тыя, пад уражаннем ад зместу і ўдалага афармлення некаторых выстаў, здымалі ўбачанае на фотакамеры, каб потым прааналізаваць і, магчыма, штосьці пераняць для сябе.
“Лепш адзін раз убачыць, чым сто разоў пачуць” – з гэтай народнай мудрасцю ўдзельнікі семінара не маглі не пагадзіцца падчас экскурсіі па нашай прыгожай Бераставіцы. Тым больш, што праводзіў яе выдатны экскурсавод– метадыст па захаванні гісторыка-культурнай спадчыны М.І.Пацэнка. Падчас наведвання Пагранічнай пасялковай бібліятэкі пазнаёміліся з работай аматарскага аб’яднання “ДИВО” па арганізацыі вольнага часу дарослага насельніцтва аграгарадка Пагранічны. У аграгарадку Вялікія Эйсманты гасцей уразіў школьны музей мінералаў “Каменны летапіс зямлі”, а ў Алекшыцах – царква ў гонар Пакрова Прасвятой Багародзіцы. Тут, дарэчы, быў зроблены акцэнт на супрацоўніцтва праваслаўнай царквы і бібліятэчных устаноў. Як яно наладжана ў Алекшыцкай СБ, расказала яе загадчыца Л.А.Мотыль.

Метадысты Падляскай ваяводскай бібліятэкі Гжэгож Кавальскі і Ізабэла Шыманска

Знаёмства з раёнам завяршылася ў Малабераставіцкай СШ. Уласна кажучы, менавіта тут, пасля наведвання музея “Вытокі”, удзельнікі семінара прыступілі да абмеркавання сваіх прафесійных пытанняў, аналізу ўбачаннага, падвядзення вынікаў сустрэчы. Гаворка вялася як аб станоўчых, так і адмоўных баках інтэграцыі бібліятэчных устаноў–аб’яднання сельскіх публічных і школьных бібліятэк, і пра асаблівасці распрацоўкі і рэалізацыі праектаў міжнароднай тэхнічнай дапамогі ў Беларусі ці, прасцей кажучы, пра тое, як сёння можна атрымаць гранд пад свой праект. У гэтым плане аказаўся цікавым вопыт Гальшанскай СБ, работнікі якой менавіта такім чынам узяліся ў сваёй сельскай бібліятэцы за стварэнне віртуальнага музея мерыдыяна Дугі Струвэ (уключанага ў спіс аб’ектаў Сусветнай культурнай спадчыны ЮНЕСКА).
Што агульнага ў нас з польскімі суседзямі ў плане бібліятэчнага абслугоўвання? Відэапрэзентацыя Падляскай бібліятэкі, якую прадэманстравалі польскія калегі, паказала, што агульнага шмат. Гэта і пошукавая краязнаўчая дзейнасць, і выдавецкія працы, а галоўнае – гэта адзіная мэта – захаваць бібліятэку як адну з самых значных крыніц інфармацыі.
Святлана Ганчарова,
фота аўтара



Теги:

Добавить комментарий

Ваш адрес email не будет опубликован. Обязательные поля помечены *