Усебеларуская патрыятычная акцыя Беларускага рэспубліканскага саюза моладзі “Мы – грамадзяне Беларусі!” на працягу ўжо многіх гадоў традыцыйна праводзіцца да Дня Канстытуцыі Рэспублікі Беларусь. Яна падкрэслівае значымасць такой важнай падзеі ў жыцці 14-гадовых падлеткаў, як атрыманне пашпарта грамадзяніна Беларусі і дапамагае маладым людзям усвядоміць, што быць грамадзянінам сваёй краіны – гэта не толькі гонар, але і вялікая адказнасць.
Сёлета мерапрыемствы акцыі таксама прайшлі ва ўсіх вугалках Беларусі на самых розных узроўнях. Далучыцца да іх змаглі і прадстаўнікі маладога пакалення бераставічан.
15 сакавіка, у Дзень Канстытуцыі Рэспублікі Беларусь, адбылося ўрачыстае мерапрыемства ў Гродзенскім абласным драматычным тэатры, на якое былі запрошаны 20 лепшых 14-гадовых падлеткаў вобласці, якія дасягнулі выдатных поспехаў у вучобе, спорце, творчасці.
Галоўны дакумент грамадзяніна Рэспублікі Беларусь ім уручыў намеснік старшыні Гродзенскага аблвыканкама Віктар Лісковіч. Сярод запрошаных на гэтае ўрачыстае мерапрыемства быў і дзевяцікласнік Малабераставіцкай сярэдняй школы Кірыл Панасевіч. Кірыл – выдатнік вучобы, член аб’яднання па інтарэсах “Спадчына”, якое дзейнічае пры народным гісторыка-краязнаўчым музеі “Вытокі”, прычым, актыўны экскурсавод школьнага музея. Акрамя гэтага, юнак займаецца даследчай дзейнасцю, на яго рахунку другое месца ў абласной навукова-практычнай краязнаўчай канферэнцыі “Край Гарадзенскі” і шмат іншых дасягненняў. Таму яго педагогі і школьныя сябры з радасцю ўспрынялі навіну аб тым, што Кірылу Панасевічу выпаў гонар атрымаць пашпарт на ўрачыстым абласным мерапрыемстве.
А 16 сакавіка ў Вялікабераставіцкай сярэдняй школе пашпарты 14-гадовым падлеткам уручыла старшы інспектар групы па 
грамадзянству і міграцыі аддзела ўнутраных спраў райвыканкама Людміла Добка. У гэты дзень свой галоўны дакумент атрымалі вучні Вялікабераставіцкай СШ Максім Жывель, Юлія Яроцкая, Вікторыя Філінчук і Сяргей Каламеец. Разам з пашпартам маладыя людзі атрымалі ў падарунак кнігу “Я грамадзянін Рэспублікі Беларусь”, а раённы камітэт БРСМ падрыхтаваў для іх памятныя сувеніры і тэкст Канстытуцыі Рэспублікі Беларусь. Першы сакратар райкама БРСМ Ірына Крывапляс павіншавала падлеткаў з гэтай знамянальнай падзеяй у іх жыцці, пажадала ім быць заўсёды годнымі грамадзянамі сваёй краіны, а таксама ўручыла членскія білеты Беларускага рэспубліканскага саюза моладзі шэрагу вучняў Вялікабераставіцкай сярэдняй школы.
Ірына МІКЛАШ, фота аўтара
