У Пархімаўцах Масленіцу гулялі – зіму праводзілі

Лента новостей Образование

Масленіца-адно з самых вясёлых і гучных старадаўніх святаў, якое доўжыцца сем дзён. Кожны дзень мае сваю назву і традыцыі. У цяперашні час складана выканаць усе традыцыі і абрады народнага свята, але даведацца пра іх было цікава.

5 сакавіка ў Пархімаўскім яслях-садзе-базавай школе адбыліся провады Масленіцы. На свята былі запрошаны не толькі вучні, іх бацькі, але і ўсе жадаючыя.

Да свята рыхтаваліся загадзя. На класных гадзінах навучэнцы даведаліся, як раней праходзілі масленічныя гулянні і што азначае гэты звычай. Сумесна з філіялам па культурна-дасугавай дзейнасці аг. Пархімаўцы дзяўчынкі развучвалі масленічныя песні.

На свяце ўсе ад душы весяліліся: вадзілі карагоды, спявалі песні і прыпеўкі, гулялі ў народныя гульні, спаборнічалі ў кемлівасці, спрыце і хуткасці.

Вядома, што блін з’яўляецца сімвалам Масленіцы, з якой пачыналася вясна, пад сонечнымі прамянямі абуджалася прырода. У старадаўніх звычаях славяне часта звярталіся да выявы Сонца. А на Масленіцу прынята заклікаць сонца, набліжаючы гэтым вясну.

На свяце ўсе з задавальненнем частаваліся блінамі з варэннем і духмянай гарачай гарбатай.

Кульмінацыяй свята стала спальванне пудзіла Масленіцы, якое суправаджалася словамі:

Масленіца-падманшчыца,

Да паста давяла – сама ўдрала!

Масленіца, вярніся, у новы год пакажыся!

Гары, гары ясна, каб не згасла!

Так мы праводзілі зіму і сустракалі доўгачаканую вясну.

Галіна АРЦЮХЕВІЧ, настаўнік пачатковых класаў Пархімаўскага ясляў-сада – базавай школы



Добавить комментарий

Ваш адрес email не будет опубликован. Обязательные поля помечены *