Вялікая Бераставіца сёння ператварылася ў маштабную маляўнічую лакацыю з нацыянальным каларытам. Выстава-конкурс караваяў і снапоў “Сімвал жыцця” заняла пачэснае месца каля Дрэва жыцця на плошчы Ратушнай. Кожны раён Гродзеншчыны падышоў да афармлення сваіх конкурсных работ крэатыўна. Багаты палёт фантазіі і арыгінальную творчую задумку прадэманстравалі ўсе ўдзельнікі.
Караваі і снапы – гэта асобная традыцыйная старонка абласнога фестывалю-кірмашу. Кожны раз стваральнікі гэтых шэдэўраў кулінарыі і дэкаратыўнага мастацтва здзіўляюць гасцей свята. А сёлета, здаецца, пераўзышлі саміх сабе.
Вытанчаныя, далікатныя, з масай дэталяў, якія можна разглядаць бясконца, – конкурсныя работы ўражваюць падачай, арыгінальнасцю і высокім узроўнем выканання. Майстры пастараліся на славу!
– Пры вызначэнні пераможцаў выставы-конкурсу мы звяртаем ўвагу на складанасць работ, эстэтычнасць, унікальнасць мастацкага дызайну, якасць выканання, крэатыўны падыход аўтараў, – адзначаюць члены журы. – І, галоўнае, наколькі ў прадстаўленых творах адлюстравана тэма конкурсу – “Сімвал жыцця”. Выбраць у якасці пераможцы толькі адзін каравай і адзін сноп вельмі складана. Усе работы выкананы з густам і крэатывам, заслугоўваюць самай высокай адзнакі.
Гербы гарадоў, нацыянальныя арнаменты, кветкі, калоссе з самых розных сельгаскультур, жніўная сімволіка, птушкі-буслы – чаго толькі не ўбачыш, разглядаючы караваі і снапы! Прыгожыя і багатыя, яны цудоўна перадаюць усе дасягненні і здабыткі нашай вобласці.
Бераставіцкі раён таксама прадставіў свае каравай і сноп, вырабленыя таленавітымі пекарамі і майстрамі бераставіцкай зямлі.
Выстава-конкурс караваяў і снапоў стала выдатнай фотазонай для гасцей свята. Людзі з задавальненнем фатаграфавалі творы майстроў-віртуозаў Прынёманскага краю і рабілі сэлфі.
Святлана Ганчарова, фота аўтара
