Рухальная актыўнасць з’яўляецца важным фактарам здароўя. У кожным узросце яна напаўняецца розным зместам, але павінна быць заўсёды.
Фарміраванню рухальнай культуры на ўроках фізічнай культуры і здароўя быў прысвечаны майстар-клас для настаўнікаў фізічнай культуры і здароўя Бераставіцкага раёна, які адбыўся на базе Канюхоўскага ясляў-сада – сярэдняй школы 18 красавіка. Актыўны удзел у майстар-класе таксама прынялі загадчык Бераставіцкага вучэбна-метадычнага кабінета Браніслаў Кісялеўскі і метадыст Алена Каламеец. Майстар-клас правяла Люцына Рукша, настаўнік фізічнай культуры і здароўя вышэйшай кваліфікацыйнай катэгорыі Канюхоўскага ясляў-сада-СШ.
Дырэктар школы Андрэй Шчука пазнаёміў прысутных з рэалізуемым ва ўстанове адукацыі рэспубліканскім інавацыйным праектам “Укараненне мадэлі фарміравання рухальнай культуры суб’ектаў адукацыйнай прасторы сельскай школы”, акцэнтаваў увагу на выніках працы першага года рэалізацыі праекта.
Люцына Рукша, настаўнік фізічнай культуры і здароўя, кіраўнік раённага метадычнага аб’яднання настаўнікаў фізічнай культуры і здароўя, пазнаёміла настаўнікаў з паняццем рухальнай культуры, яе кампанентамі.
У тэарэтычнай частцы быў прадстаўлены вопыт фізкультурна-аздараўленчай працы, які назапашаны ў Канюхоўскім яслях-садзе-сярэдняй школе.
У практычнай частцы майстар-класа Люцына Рукша з актыўным удзелам настаўнікаў паказала розныя формы работы для павышэння матывацыі да ўрокаў фізічнай культуры і здароўя. Гэта кругавая трэніроўка, комплекс практыкаванняў па аэробіцы, рухомыя гульні і г.д. Удзельнікі майстар-класа былі дастаткова актыўнымі, зацікаўленымі, таму практычная частка прайшла пазітыўна, усе справіліся з прапанаванымі заданнямі на выдатна.
Пры падвядзенні вынікаў усе прысутныя адзначылі высокі ўзровень падрыхтоўкі настаўніка фізічнай культуры і здароўя, сістэмную і зладжаную працу па фізкультурна-аздараўленчым напрамку каманды настаўнікаў, адміністрацыі, бацькоў і вучняў школы. Удзельнікі майстар-класа ацанілі карысць і актуальнасць працы ўстановы адукацыі, атрымалі таксама зарад бадзёрасці і добрага настрою.
Наталля Шмароўская, намеснік дырэктара па вучэбна-ввыхаваўчай рабоце Канюхоўскага ясляў-сада – сярэдняй школы
