Сонечны нядзельны ранак 26 чэрвеня. Прыгожы, па-святочнаму прыбраны аграгарадок Вялікія Эйсманты ў апошніх прыгатаваннях: вось-вось пачнуць збірацца госці на раённы адкрыты фестываль польскай культуры і побыту “Эйсмантаўскі фэст”. 
У наваколлі пануе радасць і асаблівае хваляванне. І гэта невыпадкова. Сёлетні фэст – юбілейны. Пяць гадоў ужо ён дорыць цудоўны настрой, знаёміць з лепшымі здабыткамі польскай культуры, дэманструе еднасць і сяброўскія адносіны ўсіх нацыянальнасцей, якія ў згодзе і добрасуседстве пражываюць на гасціннай эйсмантаўскай зямлі. А таму вельмі важна адзначыць гэты 
юбілей годна, з размахам, каб ён пакінуў у сэрцах мясцовых жыхароў і гасцей яркія і незабыўныя ўражанні.
І, трэба аддаць належнае арганізатарам свята, гэта ім удалося! Сюрпрызы, якія яны прыгатавалі, сапраўды ўразілі ўсіх, хто завітаў на фэст.
Пачалося свята з традыцыйнага адкрыцця Горада майстроў. На фэст прыехалі як ужо добра знаёмыя мясцовым жыхарам творцы дэкаратыўна-прыкладнога мастацтва, народных рамёстваў і промыслаў Гродзеншчыны, так і новыя ўдзельнікі. Ад іх прыгожых вырабаў ручной работы было проста не адвесці вачэй! Жадаючыя мелі магчымасць паўдзельнічаць у майстар-класе па ганчарнаму рамяству. Можна было набыць і сувеніры з сімволікай фэсту, у прыватнасці, майстар з Міра прапанаваў магніцікі на халадзільнік, а бераставіцкі ўдзельнік фэсту Андрэй Втарушын – памятныя паштоўкі. Сярод пастаянных удзельнікаў “Эйсмантаўскага фэсту” – работнікі аддзела рамёстваў і традыцыйнай культуры Бераставіцкага раённага цэнтра культуры і народнай творчасці.
З гісторыяй фэсту, мінулым і сучаснасцю мястэчка Вялікія Эйсманты, славутымі людзьмі эйсмантаўскай зямлі знаёмілі наладжаныя ў фае мясцовай установы культуры фотавыстава “Па старонках фестывалю” і кніжна-ілюстрацыйная выстава “Вялікія Эйсманты: повязь часоў”. Тут жа можна было палюбавацца малюнкамі юных мастакоў Бераставіцкай дзіцячай школы мастацтваў і яе Эйсмантаўскага філіяла.
Па традыцыі ў касцёле імя Марыі і Святога Яна Непамука прайшла служба “За яднанне” народаў з удзелам шматлікіх вернікаў. Вера і культура служаць адной мэце: несці мір і высокія духоўныя каштоўнасці, выхоўваць любоў да роднай зямлі, захоўваць традыцыі продкаў.
Духоўная частка праграмы “Эйсмантаўскага фэсту” пад прыгожыя гукі папулярных мелодый у выкананні народнага інструментальнага ансамбля “Вераск” настаўнікаў Пагранічнага філіяла Бераставіцкай ДШМ плаўна пералілася ў побытавую.
Адметнасцю сёлетняга юбілейнага фэсту стаў майстар-клас па развучванню польскіх народных танцаў. Мясцовыя жыхары і госці свята актыўна ўключыліся ў гэту захапляльную справу. Урокі ж танцаў давалі ўдзельнікі народнага тэатра гульні “Анфас” Квасоўскага цэнтра культуры Гродзенскага раёна.
І вось урачыстае адкрыццё V раённага адкрытага фестывалю польскай культуры і побыту “Эйсмантаўскі фэст”. У зале пачэсныя госці – намеснік старшыні Бераставіцкага райвыканкама Сяргей Чыкун, старшыня грамадскага аб’яднання “Саюз палякаў на Беларусі” Мечыслаў Лысы, старшыня Гродзенскага гарадскога аддзела аб’яднання Казімір Знайдзінскі, дапаможны біскуп Гродзенскай дыяцэзіі Юзаф Станеўскі.
Першым слова было прадастаўлена гаспадарам свята ў асобе старшыні СВК імя Варанецкага Іосіфа Коласа. Гаспадарка, якую ўзначальвае Іосіф Іосіфавіч, з’яўляецца пастаянным спонсарам мерапрыемства, не шкадуе сродкаў для таго, каб падараваць сваім працаўнікам і землякам сапраўднае свята і зарад пазітыву. Іосіф Іосіфавіч павіншаваў усіх з юбілеем фэсту, пажадаў здароўя, шчасця, дабрабыту, доўгіх гадоў жыцця і аб’явіў фестываль адкрытым.
З прывітальным словам выступіў старшыня ГА “Саюз палякаў на Беларусі” Мечыслаў Лысы. Мечыслаў Часлававіч выказаў задавальненне тым фактам, што дзякуючы намаганням раённай улады, мясцовай гаспадаркі, сельскага аддзела ГА “Саюз палякаў на Беларусі”, актывістам рэлігійнай канфесіі, “Эйсмантаўскі фэст” стаў добрай прыгожай традыцыяй еднасці і сяброўства паміж прадстаўнікамі розных нацыянальнасцей, што пражываюць на Бераставіччыне. За актыўны ўдзел у падрыхтоўцы фэсту Падзячнымі лістамі ГА “Саюз палякаў на Беларусі” былі ўзнагароджаны старшыня Бераставіцкага райвыканкама Антон Кулісевіч, яго намеснік Сяргей Чыкун, старшыня СВК імя Варанецкага Іосіф Колас і яго намеснік па ідэалагічнай рабоце Аліна Янушка, старшыня сельскага аддзела ГА “Саюз палякаў на Беларусі” Уладзімір Янкойць і настаўнік Бераставіцкай ДШМ Андрэй Втарушын. А для мясцовай польскай суполкі былі перададзены кнігі на польскай мове.
Рэхам ХІ Рэспубліканскага фестывалю нацыянальных культур у Гродне назваў “Эйсмантаўскі фэст” дапаможны біскуп Гродзенскай дыяцэзіі Юзаф Станеўскі, са сцэны вітаючы ўдзельнікаў і гасцей свята. Ён падкрэсліў, што вельмі ганарыцца тым, што ў СВК імя Варанецкага – гаспадарцы, якая заўсёды ў лідэрах, – працуюць яго сваякі. І пажадаў фестывалю доўгага жыцця дзеля справы яднання, салідарнасці, сяброўства паміж людзьмі розных нацыянальнасцей і веравызнання.
Сапраўдным упрыгожаннем “Эйсмантаўскага фэсту” стала выступленне творчых калектываў, якія ўпершыню завіталі на свята, – узорнага ансамбля польскай песні і танца “Ютшэнка” Ваўкавыскага гарадскога Дома культуры (мастацкі кіраўнік і хормайстар Алена Клімава, балетмайстар Наталля Гарбачык), узорнага тэатра моды “Спадчына” Ваўкавыскага цэнтра творчасці дзяцей і моладзі (мастацкі кіраўнік Ала Сурмілава, харэограф Марына Рудзіеўская), народнага тэатра гульні “Анфас” (мастацкі кіраўнік Дзяніс Балабуеў) з Квасоўкі. Калектывы добра вядомыя як на Гродзеншчыне, так і па-за яе межамі, адметныя сваёй самабытнасцю і непаўторнасцю.
“Ютшэнка” ўзняла настрой танцамі і народнымі песнямі. “Анфас” і яго салісты Дзяніс Балабуеў і Надзея Маркевіч бліснулі яскравым народным гумарам. Ну а “Спадчына” проста пакарыла ўсіх сваёй калекцыяй сукенак, аздобленых вытанчанай саламянай інкрустацыяй і аб’ёмнай аплікацыяй з саломкі.
Візіт артыстаў з-за мяжы, які, дарэчы, быў першым за пяць гадоў, надаў асаблівую ўрачыстасць і важнасць сёлетняму юбілейнаму фэсту, вывеў яго на міжнародны ўзровень. З канцэртнай праграмай на свята ў Вялікія Эйсманты завітаў самабытны польскі фальклорны калектыў “Цаглінкі” (мастацкі кіраўнік Мікалай Мяжэнны), ужо вядомы бераставічанам па выступленню на сцэне амфітэатра ў Дзень Перамогі.
Сваёй творчасцю падзяліўся і добра вядомы ў нашай краіне аматарскі ансамбль беларускай песні «Прымакі» з Грудка (мастацкі кіраўнік Юрый Астапчук). Гэты польскі калектыў – удзельнік многіх беларускіх фестываляў і святаў – адметны сваёй папулярызацыяй беларускіх народных песень у Рэспубліцы Польшча. Яркае выступленне польскіх артыстаў пакінула ў гледачоў незабыўныя ўражанні і прыўзняты настрой.
У канцэртнай праграме прынялі ўдзел работнікі культуры і ўдзельнікі аматарскай творчасці раёна, народны ансамбль польскай песні “Стокроткі” філіяла па культурна-дасугавай дзейнасці аг.Макараўцы (мастацкі кіраўнік Вікторыя Бажко). Вядучыя – Андрэй Аруткін і Анастасія Дубіцкая.
Завяршыўся канцэрт сімвалічным з’яўленнем на сцэне вялізнага торта са свечкамі і феерверкамі, на які расстараўся мясцовы сельгаскааператыў і якім пачаставалі гасцей свята. Традыцыйнае частаванне салодкасцямі і хатняй выпечкай, стравамі польскай нацыянальнай кухні, музычныя выступленні на каларытным і гасцінным “Заможным падворку” СВК імя Варанецкага, святочная дыскатэка і феерверк – усё гэта, безумоўна, запомніцца жыхарам аграгарадка Вялікія Эйсманты і ваколіцы. Яны яшчэ доўга будуць жыць успамінамі і чакаць новай сустрэчы. З юбілеем, “Эйсмантаўскі фэст”!
***
Цікавасць у жыхароў мястэчка Вялікія Эйсманты выклікала прэзентацыя супрацоўнікамі рэдакцыі “Бераставіцкай газеты” свайго друкаванага выдання. У гэты дзень жадаючыя атрымалі магчымасць не толькі падпісацца на “раёнку”, але і атрымаць памятны сувенір. І, трэба сказаць, што многія выкарысталі гэтую магчымасць.
Святлана Ганчарова,
фота аўтара
