У СВК “Цецяроўка” старанныя працаўнікі

Лента новостей Сельское хозяйство

IMG_5267У СВК “Цецяроўка” стараюцца ісці ў нагу з часам. Тут робіцца стаўка на перспектыўны напрамак — развіццё малочнай жывёлагадоўлі. Вытворчасць малака выгадная, яно заўсёды будзе запатрабаваным. Малочнатаварны комплекс “Рудаўляны” здалёк звяртае на сябе ўвагу сваім сучасным ахайным выглядам. У яго будаўніцтва былі ўкладзены вялікія сродкі, але такія праекты паступова акупаюцца пры захаванні новых тэхналогій і старанні людзей. Тэрыторыя комплекса агароджана, каб туды не змаглі трапіць лісы з навакольных лясоў і іншыя дзікія жывёлы, якія могуць разносіць небяспечнае захворванне – шаленства. У вобласці былі выпадкі, калі гаспадаркі неслі вялікія страты з-за гэтага.
IMG_5261Мне давялося пагутарыць з працаўнікамі жывёлаводчага аб’екта. Слесар Уладзімір Млёнік працуе на комплексе з самага яго адкрыцця, у полі яго зроку спраўнасць малочнага абсталявання. Даільная зала тут сучасная, аўтаматыка вельмі дапамагае вытворчаму працэсу. Працуе слесар па зменах, разам з аператарамі машыннага даення сочыць, каб тэхналагічны працэс быў на належным узроўні.
А жывёлавод Людміла Будніцкая родам з Брэста, у маладосці працавала на камбінатах лёгкай прамысловасці ткачыхай. Але лёс закінуў яе ў нашы мясціны – яна выйшла замуж. Адпрацавала 26 гадоў на свінакомплексе аператарам, зараз працуе на малочнатаварным. Пра спецыфіку работы гаворыць лаканічна: “І там на нагах, і тут”. Жывёлавод чысціць гумавыя дыванкі ў кароў, падсоўвае ім бліжэй кармы, каб кожная карміцелька, а іх у жанчыны 380, добра наелася і давала многа малака, бо малако, як вядома, у каровы на языку. У такой працы вельмі важная дасціпнасць і ахайнасць, бо пастаяннага “кантралёра” тут не прыставіш. Сумленны, спагадлівы і нераўнадушны чалавек, а менавіта такім і з’яўляецца наша непрыкметная гераіня, пра кожную кароўку клапоціцца, як пра сваю ўласную.
Жывёлавод Тамара Лыч працуе ў другім кароўніку, таксама ўсё стараецца зрабіць, як мага лепш. У яе такія ж абавязкі, як і ў калегі па працы. Яна прыехала ў СВК “Цецяроўка” з Пархімаўцаў. Два гады працавала паляводам, даводзілася ёй і камяні збіраць. Работа гэтая вельмі нялёгкая, але пра любы занятак, які дае хлеб надзённы, Тамара гаворыць: “Калі чалавек умее рабіць, дык усюды будзе рабіць”. Сапраўды, сцвярджэнне гэтае па-народнаму мудрае – працавітага чалавека ўсюды пазнаеш, можна вобразна сказаць, што ён “працуе прыгожа”. У гаспадарцы сям’і далі дом з прысядзібным участкам, які гаспадыня ўпрыгожыла ружамі і іншымі яркімі кветкамі. Тамара трымае жывёлу, у яе ёсць нават два адметныя персідскія каты.
Заатэхнік-селекцыянер Ірына Андрэеева мясцовая. Яна стараецца, каб планамерна раскрываўся генетычны патэнцыял жывёлы, раслі надоі. Спецыяліст сочыць, каб рагуль добра кармілі і даглядалі. А ў вольны час Ірына любіць займацца выпечкай.
Брыгадзір Іна Кардаш родам з Гродна, павучылася і ў гарадской школе, затым яе бацькі пераехалі сюды. Зараз яна завочна набывае адукацыю ў Навагрудскім каледжы. У полі зроку брыгадзіра ўвесь тэхналагічны працэс, а гэта вельмі няпроста. У мінулым годзе на гэтым малочнатаварным комплексе пачало з’яўляцца малако гатунку “экстра”. Вышэйшым гатункам за студзень гэтага года тут здалі 98 працэнтаў малака. Надой на карову склаў 544 кілаграмы.
Безумоўна, у малочнай жывёлагадоўлі дасягнуць выдатных вынікаў няпроста. Трэба вельмі старацца, каб атрымліваць высакаякасную сыравіну і нарошчваць “вал”. Строгае захаванне тэхналогій – залог поспеху. Людзі стараюцца, і работа іх вельмі нялёгкая. Няхай спадарожнічае ім моцнае здароўе, добры бадзёры настрой, папаўняюцца малочныя рэкі, расце дабрабыт кожнага працаўніка.
Ніна Наддэ, фота аўтара



Добавить комментарий

Ваш адрес email не будет опубликован. Обязательные поля помечены *