Бераставічане на “Свіслацкім кірмашы”

Рэгіянальнае свята “Свіслацкі кірмаш” адбылося ў суботу, 16 жніў­ня, ў Свіслачы. Сёлета кірмаш, які нашы суседзі адрадзілі ў мінулым годзе, супаў з раённымі Дажынкамі. У гэты дзень ушаноўвалі і ўзнагароджвалі перадавікоў жніва.
Трэба адзначыць, што даўнія традыцыі культурнага жыцця Свіслачы падчас святочнага гандлю, без сумнення, можна занесці ў скарбніцу сусветнай кірмашовай культуры. Наладжаныя ў 1792 го­дзе, дзякуючы тагачаснаму ўладальніку Свіслачы графу Вінцэнту Тышкевічу, свіслацкія Успенскія кірмашы хутка набылі папулярнасць. Сюды прывозілі свой тавар гандляры амаль з усёй Еўропы.
Арганізатары “Свіслацкага кірмашу” пастараліся аднавіць атмасферу і каларыт, якія панавалі падчас тагачасных святаў. Пра гэта сведчыць шырокая тэатралізаваная і гульнявая праграма, якая традыцыйна ўключае ў сябе выставу-продаж вырабаў народных майстроў Гродзенскай вобласці, майстар-класы па знаёмству з азамі таго ці іншага рамяства, конкурс-выставу на лепшую кветкавую кампазіцыю, выступленні лепшых творчых калектываў Гродзеншчыны, а сёлета яшчэ і Брэстчыны, традыцыйныя кірмашовыя забавы і атракцыёны, канцэрт класічнай музыкі, тэатральна-музычнае прадстаўленне “Кветкавы баль у графа Тышкевіча”, частаванне стравамі беларускай і літоўскай кухні ў “старажытных карчмах” і шэраг іншых атрыбутаў падобных гулянняў.
У рэгіянальным свяце прынялі ўдзел і бераставіцкія артысты і народныя майстры. На гульнявой пляцоўцы “Вясёлы дворык” свіслачан і шматлікіх гасцей горада веся­лілі народнымі гуль­нямі і конкурсамі прадстаўнікі Пархі­маўскага Дома культуры і вольнага часу – дырэктар установы Ірына Дзярнейка і ўдзельніца аматарскага аб’яднання “Мая сям’я” Жанна Мінда. Дарэчы, гульнявая праграма Пархімаўскага ДКіВЧ пад назвай “А ў нас, як у вас” сабрала на пляцоўцы нямала прыхільнікаў беларускіх народных кірмашовых забаў. У “Горадзе майстроў” свае саламяныя і гліняныя вырабы, прадметы вузельчыкавага пляцення, роспіс па дрэве, дробную кераміку прадстаўлялі дырэктар Бераставіцкага Дома рамёстваў, майстар саломапляцення Тамара Касьян і кіраўнік гуртка Наталля Галавач. А ўвечары на пляцоўцы з прыгожай назвай «Шляхецкі праменад» у канцэрце класічнай музыкі выступіў народны жаночы вакальны ансамбль Бераставіцкай ДШМ “Канцона”. Калектыў выканаў шэсць твораў.
Святлана Ганчарова, фота Яны Зорынай