Уборка зерневых і зернебабовых пачалася ў Бераставіцкім раёне

Спякотныя летнія дні, якія ўсталяваліся на мінулым тыдні, гарачыя не толькі ў плане тэмпературы.
Аграрыям яны прынеслі гарачую пару ўборкі зерневых і зернебабовых культур. Ужо ў пятніцу, 6 ліпеня, першыя камбайны выйшлі на палеткі некаторых СВК раёна. У прыватнасці, як паведамілі ва ўпраўленні сельскай гаспадаркі і харчавання райвыканкама, уборку азімага ячменю распачалі ў гэты дзень СВК “Пархімаўцы”, “Цецяроўка”, “Алекшыцы” і “Макараўцы”. У апошнюю гаспадарку мы і накіраваліся, каб зняць першы ў гэтым годзе выхад камбайнаў у поле.
Галоўны аграном СВК “Макараўцы” Алег Макулік даваў апошнія распараджэнні экіпажам камбайнераў (на здымку), якія пачалі ўборку азімага ячменю. На жніве гэтай культуры заняты шэсць экіпажаў камбайнераў, два з іх, якія ўзначальваюць Віталій Манцэвіч і Аляксандр Яўсейчык, — маладзёжныя, на ўборцы будуць працаваць другі год.
Пад азімы ячмень у гаспадарцы адведзена 50 га, а гэта пры добрым надвор’і на два дні работы, удакладніў галоўны аграном. Ураджайнасць гэтай культуры чакаецца больш 70 ц/га.
А ўсяго ў СВК “Макараўцы” пад зерневыя і зернебабовыя культуры адведзена больш за дзве тысячы гектараў плошчаў, гарачая пара ўборкі толькі пачынаецца, налітая спелымі каласамі ніва чакае хлебаробаў.
Ірына МІКЛАШ, фота аўтара