130-гадовы юбілей Якуба Коласа і Янкі Купалы адзначаецца ва ўстановах адукацыі Бераставіцкага раёна

Лента новостей

Школы раёна не засталіся ў баку ад святкавання 130-гадовага юбілею Якуба Коласа і Янкі Купалы. І, трэба сказаць, яно абяцае быць па-сапраўднаму маштабным і захапляльным…

Напрацягу цэлага года ў агульнаадукацыйных установах раёна адбудзецца шэраг самых разнастайных мерапрыемстваў, прысвечаных Якубу Коласу і Янку Купалу. Так, ужо цяпер у кожнай школе створаны пастаянна дзейнічаючыя экспазіцыі, прыдатныя для нагляднай дэманстрацыі жыццёвага і творчага шляху паэтаў. Акрамя таго, зараз праходзіць раённы этап рэспубліканскага конкурсу дзіцячай творчасці “Пад сінім небам”. Лепшыя вучнёўскія работы ў красавіку будуць накіраваны ў Гродна для ўдзелу ў абласным этапе конкурсу.
З цягам часу паўсюдна адбудуцца конкурсы на лепшага чытальніка вершаў, вынікам якіх стане агульнараённае спаборніцтва, запланаванае на лістапад. Таксама амаль у кожнай школе пройдуць конкурсы насценных газет. Вось і чарговы выпуск “Першай ластаўкі”, якая “выпускаецца” ў Вялікабераставіцкай сярэдняй школе, быў прысвечаны 130-годдзю з дня нараджэння паэтаў.
Лепшыя знаўцы творчасці Я.Коласа і Я.Купалы ў Вялікабераставіцкай школе змогуць паспаборнічаць ў сваіх ведах падчас літаратурнага турніру, які адбудзецца ў маі, і гульні “Што? Дзе? Калі?” па творчасці паэтаў. А група аматараў тэатральнага майстэрства з Пархімаўскай базавай школы пад кіраўніцтвам настаўніцы беларускай мовы і літаратуры Т.А.Канаевай мае намер у канцы гэтага навучальнага года паставіць спектакль па п’есе Я.Купалы “Паўлінка”.
Вучні з Вялікаэйсмантаўскай школы збіраюцца падчас летніх канікулаў на экскурсію ў Дзяржаўны музей Я.Купалы і Я.Коласа, а гімназісты з аг.Пагранічны плануюць наведаць восенню мемарыяльны музей-сядзібу Акінчыцы. У іншых жа ўстановах адукацыі школьнікі абмяжуюцца завочнымі “падарожжамі”. Напрыклад, у красавіку ў Малабераставіцкай сярэдняй школе адбудзецца літаратурна-культурная вандроўка па мясцінах, звязаных з жыццём і творчасцю Я.Купалы і Я.Коласа, а ў Алекшыцкай сярэдняй школе рыхтуецца завочная вандроўка “На ростанях”.
У Канюхоўскім яслях-садзе-сярэдняй школе пройдзе сустрэча з членамі грамадскага аб’яднання “Саюз пісьменнікаў Беларусі” — падчас яе вучні змогуць паразважаць аб творчасці беларускіх песняроў з нашымі сучаснымі паэтамі і празаікамі.
І — хто ведае? — можа, камусьці адна з такіх сустрэч ці літаратурных вечарын дапаможа ўпершыню або нанава адкрыць для сябе багаты свет творчасці Купалы ды Коласа…

Вікторыя Дзержановіч



1 комментарий по теме “130-гадовы юбілей Якуба Коласа і Янкі Купалы адзначаецца ва ўстановах адукацыі Бераставіцкага раёна

Добавить комментарий

Ваш адрес email не будет опубликован. Обязательные поля помечены *