У Музеі Вавёркі ў Вялікай Бераставіцы адкрылася выстава “Беларускае кнігадрукаванне: ад вытокаў – да сучаснасці”, прымеркаваная да Дня беларускага пісьменства.
Знаёмства з кніжным друкам пачынаецца з раздзела, прысвечанага беларускаму першадрукару Францыску Скарыне, паколькі сёлета адзначаецца 500-годдзе беларускага кнігадрукавання.
Будзе цікавы наведвальнікам раздзел “Беларускі друк Заходняй Беларусі ў 1921-1939 гг.” Тут прадстаўлены два выданні “Сялянскага календара” на 1932 і 1938 гады. У іх ёсць і астранамічныя, і астралагічныя, і гістарычныя каляндарныя звесткі, а таксама гаспадарчыя: што і калі сеяць, чым угнойваць і як даглядаць тыя ці іншыя агародныя культуры. А парады, як кансерваваць мясныя прадукты, марынаваць агародніну, грыбы і фрукты, напэўна, былі б карыснымі і для многіх цяперашніх гаспадынь. Тут жа, на выставачнай паліцы, змешчаны культурна-грамадскі і літаратурны часопіс “Беларускі Летапіс”. У нумары чацвёртым за 1937 год значная колькасць старонак прысвечана А.С.Пушкіну (якраз тады споўнілася 100 гадоў з дня смерці паэта). Сярод артыкулаў рознага зместу ў выданні ёсць вядомыя вершы Пушкіна ў перакладзе Максіма Танка. Цікава, што пераклад гэты ў зборніках Танка больш не сустракаецца, так што прадстаўлены на выставе нумар можна назваць у некаторым родзе ўнікальным. Дарэчы, на экспазіцыі ёсць і іншыя нумары гэтага часопіса.
Адметным кніжным экспанатам можна назваць часопіс “Літаратурная старонка” №1 за 1934 год. Гэта – сапраўдны рарытэт. Увесь яго тыраж быў арыштаваны польскімі ўладамі. А вось як удалося гэты нумар набыць нашаму земляку, настаўніку з Падбагоннікаў Раману Салаўю – невядома. Перадаў гэтыя каштоўныя экспанаты ў музей яго сын Леанід.
Думаецца, зацікавіць наведвальнікаў музея і раздзел “Бераставіца і бераставічане ў часопісах і кнігах”. У цэнтры раздзела – кнігі “Памяць” і “Вялікая Бераставіца і ваколіцы”. А побач – кнігі Сяргея Габрусевіча, Галіны Румак, Міколы Барэля, маці і сына Алы і Барыса Лагадаў, Кастуся Станкевіча, Андрэя Втарушына, Мікалая Пацэнкі і іншых аўтараў.
Напэўна прыцягне ўвагу і раздзел “Кнігі з аўтографам – у падарунак музею”. Тут размешчаны творы прафесараў Гродзенскага дзяржаўнага ўніверсітэта імя Я.Купалы С.Марозавай, В.Чарапіцы, С.Габрусевіча, раманы і аповесці вядомай беларускай пісьменніцы Вольгі Іпатавай і іншых.
Словам, ёсць на што паглядзець і што пачытаць. Завітайце на выставу ў Музей Вавёркі!
Мікалай Пацэнка, навуковы супрацоўнік музея,
фота Святланы Ганчаровай
На здымку: магістр гістарычных навук, галоўны захавальнік фондаў Музея Вавёркі ў Вялікай Бераставіцы Анастасія Весялуха-Волкава праводзіць экскурсію для наведвальнікаў.
