«Мы памятаем твой подзвіг, салдат”

Культура Лента новостей

DSCN0225 DSCN0229Народны гісторыка-краязнаўчы музей “Вытокі” Мала­бе­раставіцкай сярэдняй школы паспяхова працуе ў напрамку захавання памяці пра подзвіг савецкага народа ў Вялікай Айчыннай вайне. З мэтаю ўвекавечвання подзвігу і памяці воінаў-землякоў пошукава-даследчая група вучняў прыняла ўдзел у стварэнні электроннай версіі Кнігі Памяці на інтэрнет-партале аб франтавіках. У маі ў музеі адбылася сустрэча пакаленняў і прэзентацыя электроннай Кнігі Памяці аб воінах-земляках.

На працягу некалькіх гадоў вучнямі школы вядзецца вялікая работа па збору і сістэматызацыі архіўных дакументальных матэ­рыялаў аб земляках, якія ваявалі на франтах Вялікай Айчыннай вайны. У выніку ў электронную Кнігу Памяці занесены звесткі аб баявым шляху 159 франтавікоў, жыхароў Малой Бераставіцы і навакольных вёсак. Дзякуючы знойдзеным архіўным дакументам, мы атрымалі магчымасць пацвердзіць фактамі значны ўклад нашых землякоў у Вялікую Перамогу, паказаць іх мужнасць і гераізм.
Савет музея вырашыў запрасіць у музей школы на сустрэчу і прэзентацыю Кнігі Памяці родных воінаў-землякоў, жыхароў Малой Бераставіцы. Сустрэча атрымалася вельмі хвалюючай і змястоўнай.
На аснове электроннай Кнігі Памяці вучні 11 і 9 класаў стварылі прэзентацыю, прысвечаную подзвігу воінаў-землякоў. Дакументальная хроніка, архіўныя дакументы, агучаныя вучнямі ўспаміны франтавікоў, відэафільм аб салдатах-аднавяскоўцах, словы ўдзячнасці ад маладога пакалення — усё гэта сведчыла аб тым, што вучні школы свята ўшаноўваюць памяць аб земляках, якія мужна змагаліся з ворагам.
Затым з успамінамі і словамі ўдзячнасці калектыву школы выступілі ганаровыя госці: Мікалай Канстанцінавіч Акулевіч, Валерый Сяргеевіч Карытца, Ганна Іванаўна Карытца, Галіна Сцяпанаўна Красоўская, Анатолій Іванавіч Сяўко, На­дзея Васільеўна Макулік, Галіна Міхайлаўна Яўсеенка. Першым узяў слова Анатолій Іванавіч Макулік, які расказаў аб баявым шляху бацькі, Івана Данілавіча Макуліка. Іван Данілавіч з баямі прайшоў да Берліна, быў узнагароджаны ардэнамі і медалямі. Анатолій Іванавіч перадаў у фонды музея некаторыя рэліквіі, якія засталіся ад яго бацькі. Валерый Сяргеевіч Карытца падзяліўся ўспамінамі аб выпрабаваннях, якія выпалі на долю яго бацькі, Сяргея Канстанцінавіча Карытца. Баявы шлях Сяргея Канстанцінавіча пачаўся ў 1942 годзе пад Сталінградам, а завяршыўся ў 1945 годзе ў Аўстрыі. Мноства ўзнагарод свед­чаць аб удзеле Сяргея Канстанцінавіча ў самых значных і складаных баявых аперацыях, у якіх ён праявіў сябе як выдатны воін і камандзір. Выступленне Галіны Міхайлаўны Яўсеенка было пранікнута гонарам за бацьку, Міхаіла Васільевіча Дудко, які мужна ваяваў на 3-м Беларускім фронце, быў паранены. Да Галіны Мікалаеўны далучылася Надзея Васільеўна Сяўко, якая расказала аб баявым шляху бацькі, Васілія Іванавіча Бандарыка. Васілій Іванавіч удзельнічаў у штурме Кёнігсберга. Мікалай Канстанцінавіч Акулевіч у сваім выступленні адзначыў, што яго бацька, Канстанцін Мікалаевіч Акулевіч, быў узнагароджаны медалём “За адвагу”, таксама меў медаль “За ўдзел у абарончай вайне 1939 года”.
Удзельнікі сустрэчы атрымалі магчымасць азнаёміцца з вучнёўскімі навукова-даследчымі работамі аб земляках, удзельніках Вялікай Айчыннай вайны.
Усе ганаровыя госці выказалі падзяку вучням за памяць аб іх родных, аб усіх воінах-земляках, якія ўдзельнічалі ў барацьбе з нямецка-фашысцкімі ворагамі.
Савет музея прадаўжае работу па захаванні памяці аб воінах-земляках, якія ваявалі на франтах Вялікай Айчыннай вайны. Папаўняецца электронная Кніга Памяці, прадаўжаецца пошукава-даследчая дзейнасць па адкрыцці новых старонак ваеннай гісторыі краю.
Вікторыя Кісялеўская,
дырэктар
Малабераставіцкай СШ,
Тамара Эйсмант, кіраўнік народнага гісторыка-краязнаўчага музея “Вытокі”



Добавить комментарий

Ваш адрес email не будет опубликован. Обязательные поля помечены *