Вучні Масалянскага ясляў-сада-пачатковай школы пабывалі ў Музеі Вавёркі ў Вялікай Бераставіцы

У суботу, 25 лютага, вучні Масалянскага ясляў-сада-пачатковай школы пабывалі ў Музеі Вавёркі ў Вялікай Бераставіцы. Іх гасцінна сустрэлі супрацоўнікі музея. Экскурсавод пачаў экскурсію з залы, дзе жыве сапраўдная вавёрка. Там жа знаходзіцца карта і электроннае табло, націскаючы на якое, дзеці маглі даведацца, якія віды вавёрак жывуць у розных частках свету. З цікавасцю рабяты дакраналіся да кавалкаў меху лісіцы, зайца, вавёрачкі.

У наступнай зале рабятам расказалі, чым харчуецца вавёрка, якія віды вавёрак жывуць у Беларусі, як звярок ўцяпляе сваё дупло. Дзеці ўбачылі чучалы вавёркі-палятухі, куніцы лясной і куніцы каменнай, гарнастая, ласкі, тхара. Іх уразіла прыгажосць лісіцы і рысі.

Затым дзеці перайшлі ў залу, дзе пазнаёміліся з гісторыяй роднага краю. Яны адчулі асаблівы гонар, калі ўбачылі фотаздымкі Масалянскай царквы і палаца Біспінгаў, а таксама экспазіцыю, прысвечаную творчасці нашага земляка, Івана Леткі, пачулі расказ пра яго творчы шлях.

Напрыканцы экскурсіі дзеці змаглі набыць сувеніры, сфатаграфаваліся каля экспанатаў, якія іх зацікавілі. Дадому ўсе вярталіся з самымі добрымі ўражаннямі.

Вялікі дзякуй супрацоўнікам музея і кіраўніцтву РУСП “Масаляны” за магчымасць пабываць у такім цудоўным месцы!

Ірына Максімік, настаўнік пачатковых класаў Масалянскага ясляў-сада-пачатковай школы