Дарагiя браты i сёстры!
Хрысціянскі свет зноў уваходзіць у святкаванне вялікай падзеі – Нараджэння Божага Сына. Евангелле ў чарговы раз вядзе нас у Бэтлеем, у месца Нараджэння доўгачаканага Збаўцы. Гэтая падзея перакрочвае межы часу, і мы не толькі ўспамінаем Нараджэнне Хрыста, мы зноў і зноў сустракаем з’яўленне Бога ў гэтым свеце.
Езус прыйшоў на зямлю не для таго, каб паглядзець, як нам жывецца, прывітацца з намі і вярнуцца да Айца. Ён прыйшоў, каб узяць на сябе зло ўсяго свету, вызваліць нас ад саміх сябе і адчыніць нам шлях да Айца, да вечнага збаўлення. Але і мы самі павінны абудзіцца, як тыя пастушкі, што на заклік анёлаў пайшлі шукаць Нованароджанага Збаўцу ў Бэтлееме, каб наша вера магла ўратаваць гэты свет ад бяды, паказаць шлях да сапраўдных хрысціянскіх каштоўнасцей.
Жадаем, каб Бэтлеемская зорка свяціла над кожным з нас як над той адзінай стайняй, у якой так моцна жадаў нарадзіцца Божы Сын.
Падзяляючы з вамі святочную радасць і дзелячыся аплаткам, складаем усім вам найлепшыя пажаданні. Няхай Божае Нараджэнне прынясе ўсім нам так патрэбны спакой і духоўную сілу, каб зло, якое існуе ў свеце, не знаходзіла больш месца у сэрцах людзей. Няхай Дзіцятка Езус адорыць вас сваім благаслаўленнем і патрэбнымі ласкамі, а святло Божага Нараджэння няхай асвятляе ўсе цяжкасці і будзе правадніком у штодзённым жыцці.
Святочнай радасці, міру, спакою, дабрабыту і шчодрых ласкаў ад народжанага Боскага Дзіцяці на ўвесь калядны час і на ўсе дні Новага 2021 года жадаем усім вам, браты і сёстры!
З благаслаўленнем, святары Бераставіцкага дэканата
