На базе Бераставіцкай раённай цэнтральнай бібліятэкі імя Кавалеўскага з 1998 года працуе аматарскае аб’яднанне – жаночы клуб “Паклічу сяброў”. У склад яго ўваходзяць пятнаццаць жанчын пенсійнага ўзросту, якіх аб’ядноўваюць агульныя інтарэсы і ўспаміны, духоўная блізкасць, імкненне правесці вольны час з карысцю, жаданне заставацца запатрабаванымі і актыўнымі членамі грамадства. Пасяджэнні клуба праходзяць адзін раз у месяц. Як правіла, падчас іх адбываюцца сустрэчы з таленавітымі, цікавымі, паважанымі людзьмі Бераставіччыны – мастакамі, паэтамі, спевакамі, краязнаўцамі і іншымі творчымі асобамі, прадстаўнікамі мясцовай улады, ветэранамі Вялікай Айчыннай вайны і многімі іншымі.Кастрычніцкая сустрэча была асабліва цёплай і шчырай, а гутарка і ўспаміны – надзвычай пранікнёнымі. Бо на сустрэчу свой адбітак паклаў сам час яе правядзення – менавіта ў кастрычніку святкуецца Дзень пажылых людзей і Дзень Маці. Са словамі ўдзячнасці і павагі да жанчын-матуль, якія сабраліся ва ўтульнай чытальнай зале райбібліятэкі звярнуўся госць сустрэчы, індывідуальны прадпрыймальнік Андрэй Горбач, які, дарэчы, выступіў спонсарам “салодкага стала”, арганізаванага для ўдзельніц клуба. Яшчэ адзін госць пасяджэння, дырэктар Музея Вавёркі ў Вялікай Бераставіцы Аляксандр Галавач, расказаў жанчынам аб сённяшнім становішчы спраў у музеі, аб перспектывах яго адкрыцця для наведвальнікаў, аб працэдуры апісання і рэгістрацыі музейных экспанатаў, а таксама адказаў на пытанні ўдзельніц клуба.
Кастрычніцкая сустрэча ў клубе “Паклічу сяброў” за кубкам чаю і ў прыемнай кампаніі стала чарговым пацверджаннем таго, што бібліятэка – цудоўнае месца для душэўнага адпачынку.
Святлана Ганчарова,
фота аўтара
